Son dövrlərdə ölkədə fəaliyyət göstərən elektronika mağazalarından vətəndaşların şikayətlərinin ardı-arası kəsilmir. Keyfiyyətli telefon almaq istəyib, problemlə qarşılaşan vətədaşlardan biri də Aida Rəhmanovadır.

Millitv.az xəbər verir ki, o, “Baku Electronics”də başına gələn problem haqqında Teleqraf.com-a danışıb.

Müştəri bildirir ki, 2020-ci il 27 noyabr tarixində adıçəkilən mağazadan endirim ərəfəsində 499 manata “Xiaomi Redmi Note 9S64GB Gray” modelli mobil telefonu nağd ödənişlə alıb. Onun sözlərinə görə, qısa zamanda telefonu istifadə etdiyi bir neçə gün ərzində nazaslıqlar özünü göstərməyə başlayıb:

“Telefon mağazada satıcı Mübariz tərəfindən “nastroyka” olunmuşdu. Cihazdan istifadə etdiyim müddətdə mənə format olunmuş, işlənmiş telefon təəssüratı bağışlayırdı. Telefona gələn informasiyaların tarixi olmurdu, bütün funksiyaları əvvəlcədən aktiv idi, telefonu enerji yığmağa qoyduqda həddindən artıq qızması müşahidə olunurdu. Növbəti ayda dəfələrlə mağazaya müraciət etdim. Telefonun ya təzəsi ilə dəyişdirilməsini, ya da pulumu qaytarmalarını tələb etdim.

Lakin məni həmişə yola salıb deyirdilər ki, belə olmalıdır, normaldır və bu telefon “Xiaomi”nin ən yaxşı, ən güclü telefon seriyalarındandır. Sonradan satıcı yoxa çıxdı, onun transfer olduğu yeri belə deyilmirdi, hər şey ört-basdır edilirdi, telefondan istifadə edə bilmirdim”.

Şikayətçi qeyd edir ki, bir müddət sonra telefonda batareya problemləri aşkarlanıb: “Sonradan telefon dəhşət dərəcədə qızmağa başladı, hətta mən qorxdum ki, o partlaya bilər və batareya enerji yığdığı zaman çox ehtiyatla davranırdım. Yenidən mağazaya müraciət etdim, əvvəlki tələblərimi irəli sürdüm, lakin heç bir məsul işçiyə yönləndirilmədim. Ona görə “Baku Electronics”in 143 telefon xidmətinə zəng etdim, orada bildirdilər ki, mən ancaq müraciət formasını doldurub şikayətimi şirkətin müdiriyyətinə yollaya bilərəm. Məni heç kim qəbul etmədi.

Şikayətimi mağazada yazıb, şikayəti qəbul edən işçiyə təqdim etdim. Mənə “Baku Electronics”in servisi − Azadlıq 116-ya getməyi məsləhət gördülər. Burada ancaq “Samsung” telefonlarının servisi mövcuddur, halbuki mağazada mənə bütün telefonların servisi, o cümlədən “Xiaomi” servisinin olması deyilmişdi”.

Bundan sonra şirkət tərəfindən şikayətçinin telefonu zəmanət talonu ilə birlikdə 23 noyabr 2021-ci il tarixində servisə yollanıb: “Orada məni Flora adlı işçi qəbul etdi və telefonu “Xiaomi” servisinə yollayacağını dedi. “Mixtech” sevis mərkəzi mənim telefonumu 24 noyabrda qəbul edib, usta Zaura diaqnostika üçün vermişdi.

6 dekabr telefonumun hazır olma tarixi idi. Sənəd Rövşən A. tərəfindən imzalanmışdı. Bu müddətdə mən “Mixtech” servisə müracət edərkən mənə bildirildi ki, telefon tam açılıb və diaqnostika olunub, qeyd edilən qüsur təsdiqini tapıb, bunu yazılı mənə verdilər, problem “proşivka” ilə əlaqədardır.

Halbuki qüsursuz, keyfiyyətli məhsul − telefon ən azı 2 il heç bir proşivka və batareya problemi olmadan normal işləməlidir. 9 dekabrda telefonumu “Samsung” servisdən alarkən telefonda açılma izlərini gördüm.

Operator Flora bunu təkzib etdi, hətta “Mixtech” servisin aktını belə mənə vermək istəmirdi. Təkidlə mənə bu aktın ancaq surətini təqdim etdi. Sonradan mən bu aktın əslini servisin müdirindən götürdüm. Halbuki qanunla mənə əvvəlcədən əsli təqdim edilməli idi. Operator Flora düzgün məlumat vermir, hər şeyi ört-basdır edərək hüquqlarımı pozurdu”.

Cavabsız qalan müraciətlərə baxmayaraq müştəri haqqını tələb etmək üçün “Baku Electronics”in Azadlıq prospektində yerləşən filialına gedib: “Kompüterdə baxıb, dedilər ki, mənim doldurduğum müraciət-şikayət ərizəsini alıblar, lakin məni qəbul etməkdən imtina edirlər. Mağazanın Füzuli adında rəhbəri məni Nərimanov mağazasının Sənan adlı məsul işçisinə yönəltdi. Bu müddət ərzində telefonum yenə bildiriş verirdi ki, telefonda 1, sonradan 2 problem var. Bundan əlavə, telefonum 2 dəfə özü-özünə səbəbsiz sönmüşdü. Bunların hamısını mağazanın rəhbəri Sənana dedim. O yenidən mənə dedi ki, “telefon açılmayıb, proşivka problemi həll olunub, yeni proqram yazılıb. Sizin icazəniz olmasa, telefon açıla bilməz”.

Bundan sonra “Mixtech” Servisin müdiri Kənana müraciət etdim. O mənə bildirdi ki, telefon açılıb və usta Zaur tərəfindən diaqnostika olunub. Əlavə bildirdi ki, telefon 1%-də zaryadkaya qoyulub və 100% çıxarılmalıdır".

Bütün bunlara baxmayaraq Şikayətçi Aida Rəhmanovaya heç bir köməklik göstərilməyib. O, bu barədə Azad İstehlakçılar Birliyi, İqtisadiyyat Nazirliyi yanında İstehlakçı Hüquqlarının Qorunması qurumuna da məlumat verib.

Təəssüf ki, uzun müddət fəaliyyət göstərən “Baku Electronics”in təcrübəli müdiriyyəti Azərbaycan vətəndaşına qarşı bu qədər laqeyd və səhlənkardır.