Bu gün uzun illərin dostu, gözəl şair, publisıst, sədaqətinə, səmimiyyətinə, dürüstlüyünə görə sonsuz hörmət bəslədiyim Əbülfət Mədətoğlunun dünyaya göz açdığı gündür. Əbülfət Mədətoğlu 1959-cu iliin yanvar ayının 1-də Qarabağqda, Xocavənd rayonunun Tuğ kəndində dünyaya gəlib. Azərbaycan Dövlət Universitetinin Tarix fakültəsində ali təhsil alıb. Eyni zamanda, Jurnalist Sənətkarlığı İnstitutunu da bitirib. Elə o vaxtdan da müxtəlif mətbu orqanlarında çalışıb. Mən ona həmişə deyirdim ki, sən ürəyimə yaxın olan ən səmimi insansan. Əbülfətin köhnə kişilərə xas olan təmkini, mərdliyi, səmimiyyət dolu davranışı ,həyata nikbin baxışları onu tanıyan bütün insanlara sevdirən əsas xüsusuyyətləridir. Hər yeni ilin gəlişi ilə bir təqvim səhifəsini çevirərək bir yaş da müdrikləşir, həyatı, insanları daha çox sevir. Onun dövri mətbuatda şair kimi yaradıcılığı ilə bağlı tanınmış tənqidçilərin müsbət fikirləri, təhlili və şərhlərinə tez-tez rast gəlmək olar. Kitablara sevgisi isə inanılmaz dərəcədə böyükdür. Öz sözlərinə görə, əlifbanı tanıyandan mütaliəni sevib:” Bizim kənd kitabxanamız çox zəngin olub. Kəndimiz işğal olunanadək evimizdə özümün də böyük kitabxanam var idi. Və kənddə bunu hamı bilirdi. Mən onların təqribən 3 min nüsxəsini kənddən çıxara bildim. Bu gün də Masazırdakı evimdə ayrıca bir kitabxanam var.”Ədəbi gəncliyi daim izləyən, gənc yazarlarla səmimi münasibət quran dostum "Ədalət” qəzetində onlara kifayət qədər yer ayrılması üçün daim əlindən gələni edib. Həyatı boyu çox çətinliklərlə üz-üzə gəlib, ömür yolu heç də hamar keçməyib. Orta məktəbi bitirdikdən sonra 1976-1978 ci illərdə Tuğ kənd Oktyabr sovxozunda fəhlə işləyib. 1978-1980-ci illərdə Sovet ordusunda xidmət edib. Ordudan tərxis olduqdan sonra"Təşviqatçı" jurnalında korrektor kimi çalışıb. "Araz" qəzetində şöbə müdiri (1986-1988), "Qarabağ" qəzetində (1988-1990) və "Azərbaycan ordusu" qəzetində (1990-1992) müxbir vəzifələrində işləyib. Q992-ci ildən "Ədalət" qəzetinin baş redaktor müavinidir. Azərbaycan Respublikası Prezidentinin 21.07.2010-cu il tarixli Sərəncamı ilə Əliyev Əbülfət Mədət oğluna Azərbaycan milli mətbuatının inkişafındakı xidmətlərinə görə “Əməkdar Jurnalist” fəxri adı verilib. Eyni zamanda "Qızıl qələm", "Şahmar Əkbərzadə","Məmməd Araz", Azərbaycan Respublikası Mədəniyyət Nazirliyinin "Qızıl Kəlmə" və "Media Açarı" mükafatlarına laiq görülüb. Dediyinə görə, bədii yaradıcılığa orta məktəb illərindən başlayib. İlk mətbu "Kəndim" və "Şorbulaq" şeirləri "Araz" Füzuli rayon qəzetində çap olunub. Bundan sonra "Azərbaycan", "Ulduz", "Təşviqatçı" jurnallarında, "Azərbaycan gəncləri", "Bakı", "Sovet kəndi", "Azərbaycan pioneri" qəzetlərində vaxtaşırı imzası görünüb. "Səməni nəğməsi", "Nilufər çiçəyi", "Dərdini danışan adam", "Nişanə", "Ehtiyacın elçi daşı", "Döymək istədiyim qapılar", "Allah, məni unutma", "Ürəyimdəki sənsən"(Bakı,Tehran),"Yüreyimdeki sensin" (Ankara),"Ağacların şarkısını yapraklar okuyor" (İstanbul), "Hər görüş bir ümiddir", "Sevgi pıçıltıları", "Yanan məktublar", "Mənim kimi sevə bilsən", "Gözləyənim var", "Ürəyim sənlə danışır", "Cəzayam sevdiyim qıza","Bir qadına" şeir kitabları və "Qəhrəman İbad", "Zəhmli polkovnik", "Üfüqdə görünən adam","Sözə ünvanlanmış 15 məktub", "İç dünyamın adamları","Mərhəmət və xeyirxahlığa QABİL insan", "Qovuşan ulduzların nağılı", "Bir ömürdən səhifələr" sənədli povestləri işıq üzü görüb. Yazdığı şeirlərə tanınmış bəstəkarlar Xanım İsmayılqızı, Razim Paşayev, Zəka Vilayətoğlu, İqbal Ağayev musiqilər bəstələyiblər. Həmin bəstələri Xalq Artisti Yalçın Rzazadə, Səyyad Əlizadə, Zəka Vilayətoğlu və başqaları ifa ediblər. Onun yaradıcılığı barəsində qüdrətli söz adamları Xalq şairləri Bəxtiyar Vahabzadə, Ramiz Rövşən, Musa Yaqub, Xalq yazıçısı Elçin, akad Nizami Cəfərov, Nahid Hacızadə, Vaqif Nəsib,Seyran Səxavət, Nemət Veysəlli, Çingiz Əlioğlu, Vaqif Bəhmənli, Nərgiz Cabbarlı, Barat Vüsal, Flora Xəlilzadə, Şəfəq Nasir, Kəmalə Abıyeva, Ağacəfər Həsənli, Rafael Tağızadə, Zakir Fəxri, prof Esmira Fuad, prof Akif Əli, prof Vaqif Yusifli, prof Rüstəm Kamal, prof Rafiq Yusifoğlu, tanınmış elm adamları Qurban Bayramov, Allahverdi Eminov və başqaları dəyərli fikir söyləyiblər. Qayğıkeş ailə baçısı, gözəl ata, babadır. Hazırda Türkəyədə müalicə alan əziz dostumu 64-cü yaş gününə qədəm qoyduğu üçün ürəkdən təbrik edir , ona şəfalar və uzun ömür diləyirəm.
O mənim həyatımda,
Günümdə, anımdadı..
Atdığım hər addımda -
Damarda qanımdadı...
İçimdəki səsdi O,
Aldığım nəfəsdi O...
Sabaha həvəsdi O -
Ruhumda, canımdadı!
Nəşəmdi, ahımdı O
Sevgim, günahımdı O...
Yerdə Allahımdı O -
Ölüncə yanımdadı...
Tanrının eşq mələyi
Məcnunların diləyi...
Olub şair ürəyi -
Adımda, sanımdadı!
Mirzəağa Məmmədli
