Hər səhər yuxudan oyanan kimi su kanalına tərəf qaçırıq. Deyirik, birdən kanala su gələr, xəbərimiz olmaz”.

Səhərlərini möcüzə arzusuyla açanlar Sabirabadın Çöl Beşdəli kəndinin sakinləridir. Səhərlər gözlərini ova-ova kəndin ortasından keçən su kanalını yoxlamağa gedirlər. Ancaq hər dəfə də boş vedrələri yellədə-yellədə geri dönürlər. Uzun illərdir ki, Çöl Beşdəli və qonşuluqdakı kəndlərdə yaşayanlar yay fəsli gələndən ta payızadək susuzluqdan əziyyət çəkirlər.

“Kənddə filtirlənmiş su ötürülən krantlarımız var, ancaq heç vaxt su gəlmir. Ona görə də kanalın suyunu duruldub, işlədərdik. Neçə ildir ki, yay gələndə kanalda da su olmur. Gəlib baxsanız, görəcəksiniz ki, kanalın içərisində ya uşaqlar oynayır, ya da inəklər yatır”, – kənd sakini Samirə Əliyeva Meydan TV-yə danışır.

Mərhəmətli qonşular

Samirə xanım deyir, çox vaxt bu kənddə bir qonşu öz su problemini digər qonşunun hesabına həll edir:

“Bayaq siz zəng edəndə, mən 5-6 küçə o tərəfdə yaşayan qonşunun hovuzundan su daşıyırdım. Kimin bir az imkanı varsa, hovuz tikir, suyu da pulla alır, hovuzunda həmişə suyu olur. Mənim kimi imkansızlar da gedib ordan su götürür, sağ olsun belə qonşu”.

Samirə Əliyevanın iddiasına görə, əgər kənddən keçən su kanalına müdaxilə olmasa, hamı su görər:

“Kəndimizdən 2 kilometr qabağa getsəniz, görəcəksiniz ki, kanalda su var. Sadəcə, kanalın kəndimizə tərəf olan qolunun qarşısını kəsiblər, suyun istiqamətini məmurların əkin sahələrinə dəyişiblər. Bunu rayonda suya nəzarət edən hər bir məmur yaxşı görür, xəbəri də var. Çünki bunu edən də elə özləridir”.

Susuzluq pambıqçını yarı yolda qoyub

Kəndin ərazisindəki sahələrdə pambıq əkininə üstünlük verən hökumət suvarma məsələsini həll etsə də, su vaxtında verilmədiyi üçün sahələr “külə dönür”. Məsələn, kənd sakini Avtandil Əliyev bir neçə ildir ki, pambıqçılıqla məşğul olur. Ancaq həl il bu işdən zərərlə çıxır. Səbəb eynidir – su qıtlığı. İddia edir ki, bu qıtlığı yaradan rayonda suya nəzarət edənlərdir:

“Bir azdan məhsul yığımı başlayacaq, zavoda pambıq təhvil verməliyəm, ancaq yenə məhsul götürə bilməyəcəm. Kim çox pul verirsə, su da onun əkin sahəsinə yönəldilir”.

Avtandil Əliyev deyir, kənddə işsizlikdir. İnsanlar gözlərini əkinə dikib. Sahələrin susuzluqdan yanmasısa ailələrin ac qalmasına bərabərdir.

“Meliorasiya və Su Təsərrüfatı” ASC-nin Sabirabad Suvarma Sistemləri İdarəsi isə iddiaları qəbul etmir. İdarədən Meydan TV-yə bildirilib ki, sahələrin suvarılması üçün kifayət qədər su ehtiyatı var: “Hamı istəyir ki, birinci onun sahəsi suvarılsın. Ancaq bu iş növbəlilik qaydasında olur”.

Rayonun Su-Kanal İdarəsindənsə içməli su probleminə aydınlıq gətirilib:

“Gəlin, birlikdə gedək kanala baxaq, görək harda qazılıb, istiqaməti dəyişdirilibmi? Kanalda su havanın quraqlıq keçməsi səbəbindən quruyub. Bir neçə kəndin su təminatıyla bağlı alternativ yollar araşdırılır”.

2016-cı ildən başlayaraq pambıqçılığın inkişaf etdirilməsi hökumətin əsas diqqət ayırdığı sahələrdən birinə çevrilmişdi. Hökumət bu sahəni inkişaf etdirməklə həm yeni iş yerlərinin açılmasını, həm də ölkəyə valyuta axınını artırmağı düşündüyünü bəyan etmişdi. Həmin il prezidentin verdiyi sərəncamla emal müəssisələrinə satılmış hər kiloqram xam pambığa görə, istehsalçılara 0,1 manat subsidiya verilməsi də qərara alınmışdı. Prezident bildirmişdi ki, 2017-ci ildə pambıqçılıqda 200 mindən çox insan işlə təmin olunacaq. Ancaq bəzi ekspertlər hökumətin pambıqçılığın inkişafına xüsusi diqqət ayırmasını perspektivsiz hesab edirdilər. Onlar deyirdilər ki, pambıqçılığın neftlə müqayisədə əziyyəti çox, gəliri isə azdır. Hökumətin pambıq layihəsindən 5 il keçib və ötən müddət ərzində bu layihə özünü doğrultmayıb. Fermerlər bildirirlər ki, buna əsas səbəb susuzluq olub. Daha dəqiqi, ya quraqlıq üzündən su tapılmayıb, ya da su yalnız məmurların pambıq sahələrinə verilib. Nəticədə, ötən 5 il ərzində kəndlilərə məxsus yüzlərlə hektar pambıq sahələri yanıb. //Meydan TV//