Sovet dövründə eşitdiyim maraqlı bir ifadə yadıma düşdü:
Yarısı əlil, yarısı zəlil, şairi də......Xəlil.
Əlbəttə, bunu ciddi arqument kimi qəbul etmirik. Amma...
Əmması odur ki, illər öncə Gündəlik-Bakıda yazdığımız “Bu yollar bizi hara aparır: Mənzil başına, yoxsa qəbristanlığa..?” başlıqlı yazıda dediklərimizi yada saldıq.
Bəli, 2 gün öncə Azərbaycan Statistika Komitəsinin rəsmi məlumatını oxuyanda dəhşətə gəldik.
Təsəvvür edirsiniz, Azərbaycan avto-yol qəzalarında ölən və yaralanan, zəlil olanların sayına görə dünyada az qala birincidir. Bu rəsmi statistikadır haa...jurnalist uydurması deyil...
Bunun üzərinə başqa bir rəsmi rəqəmi də gələk...
Rəsmi açıqlamaya görə, hər il Azərbaycanda 553 əlil uşaq dünyaya gəlir...
Bax, ona görə biz illər öncə Gündəlik-Bakıda yazdıq ki, yollarda ölənlər, Qarabağ müharibəsində şəhid olanlardan qat-qat çoxdur.
Onda yazdıq ki, şəhid olanın təsəllisi var ki, vətən uğrunda şəhid oldu, bəs yollarda təsadüfi qəzalardan ölənlərin doğmaları nədən təsəlli tapsın...
Bu uzun girişin səbəbi odur ki, müxtəlif səbəblərdən, yolda, qəzada, Qarabağ müharibəsində, yaxud iş yerində, tutaq ki, anadan gəlmə əlil olanların problemi bütün dünyada var. Bu məsələ təzə deyil, bütün dövlətlərdə əlillərin problemi ilə ciddi məşğul olunur.
Və bu məsələ konkret olaraq Əmək və Əhalinin Sosial Müdafiəsi Nazirliyində həll edilir.
Daha doğrusu, nazirliyin nəzdində Dövlət Tibbi- Sosial Ekspertiza və Reabilitasiya Xidməti ( DTSERX ) deyilən qurum var, yəni “Qosslujba”. Balaca qurum deyil ee, nazirliyə bərabər qurumdur. Onun da tabeçiliyində Tibbi-Sosial Ekspert Komissiyası (TSEK) deyilən altqurum var.
Bütün problemlər, rüşvət və korrupsiya halları burada baş verir.
Loru dildə desək, Əmək və Əhalinin Sosial Müdafiəsi Nazirliyi “əlillərin və imkansız insanların nazirliyidir”.
Allah qoymasa bu nazirliyə 6 il rəhbərlik etmiş şəxs, yəni Səlim Müslümov az qala 2 ildir həbsdədir...
İndi özünüz əlillərin və sosial təminata ehtiyacı olanların durumunu təssəvvür edin.
Yeri gəlmişkən, Səlim Müslümovun, yaxud indiki nazir Sahil Babayevin yerinə bir əlili, yaxud zəlili nazir təyin etsəydilər, bəlkə də bu gün vəziyyət daha effektli olardı.
Nə isə sabiq nazir Səlim Müslümovun dövründə saxta əlillik məsələsinə görə, son 2 ildə minlərlə insanın əlillik statusu ləğv edilib.
Birincisi, bu saxtakarlığı dövlət qurumları edibsə, vətəndaşın nə günahı..?
İkincisi, hətta Qarabağ müharibəsində ayağını itirmiş qazini yenidən komissiyaya çağırıb günlərlə, bəzən aylarla get-gələ salırlarsa, bunun günahı kimdədir..?
Bu gün Azərbaycanda az qala anektoda çevrilən bir məsələ var.
Qazini çağırıb kəsilən ayağının uzanıb-uzanmadığını yoxlayırlar, dizdən aşağı, yoxsa dizdən yuxarı məsələsini qabardırlar...
Görəsən “Əmək nazirliyi”ndə oturanlar başa düşmür ki, kəsilən ayaq necə uzana bilər..?
Ümumiyyətlə, Əmək və Əhalinin Sosial Müdafiəsi naziri Sahil Babayev nazir kreslosuna əyləşdiyi 4 il müddətində ölkə əhalisinin əlil, şikəst, təqaüd, sosial yardım alan və təqaüd almalı olan kəsiminin vəziyyətini daha da ağırlaşdırıb.
Bununla da o, əlil insanların ailəsini ac qoyub, özlərini isə intihar həddinə çatdırıb. Bu yolla dövlət büdcəsindən ayrılan vəsaitə "qənaət" edərək, əlillərə zülm etməkdən belə, çəkinmir.
Əlil vətəndaşlar yazır ki, nazir kürsüsünə əyləşən gündən Sahil Babayev xalqa divan tutur, millətin sosial müdafiəyə möhtac olan kəsimini daha ağır duruma salmaq üçün əlindən gələni əsirgəmir.
Və bütün bu işləri Tibbi-Sosial Ekspert Komissiyasının (TSEK) sədri Mətanət Məmmədovanın əli ilə edir.
Əlil statusu olan şəxslər Ekspertiza Mərkəzinə çağrılır və rüşvətin qarşılığında yenidən ya əlil olurlar, rüşvət verməyənlər isə “sağlam” olurlar, onların əlillik statusu ləğv edilir.
Məlumatlı şəxslər yazır ki, Sahil Babayev nazir olan kimi nazirliyin peşəkar əməkdaşlarını və mütəxəssis kadrları işdən uzaqlaşdırdı və yerinə təcrübəsiz qohum - əqrabasını, tələbə yoldaşlarını, pivə və domino həvəskarı olan dostlarını gətirdi.
Sahil Babyevin nazir olduğu dönəmdə xeyli sayda Qarabağ əlili vaxtından əvvəl dünyasını dəyişdi.
Hələ bu harasıdır..?
Sahil Babayevin Dünya Bankından alınan 17 milyon dolları necə silməsi, məşğulluq adı altında dövlətin ayırdığı milyonları kimlərsə xəstə inək verməklə mənimsəməsi və s barəsində növbəti yazıda bəhs edəcəyik.
Yazıda müxtəlif saytların materiallarından istiafdə edilib.
Qarşı tərəfin mövqeyini dərc etməyə hazırıq. //gundelik-baku.com//