“Azərbaycanda müəyyən tikinti şirkətləri var ki, icazə almadan tikintiyə, söküntüyə başlayırlar. Onları dayandıracaq qurum da yoxdur”.
Dia-az.info xəbər verir ki, bu fikirləri deputat Qüdrət Həsənquliyev parlamentin plenar iclasında bildirib.
Deputatın sözlərinə görə, məhkəmələrin qərarları açıq-aşkar icra olunmur: “Belə tikinti şirkətlərinin rəhbərlərinin gözlərini pul elə tutub ki, Allahdan belə qorxmurlar. Anlamırlar ki, Allah bir gün onlara qan qusduracaq. Müavinim Elçin Mirzəbəylinin həyat yoldaşının, baldızının adına olan evi heç bir kompensasiya ödəmədən gəlib söküblər.
Mən bilirəm ki, bu, Ombudsmanın gücü çatacaq məsələ deyil, amma soruşmaq istəyirəm, siz nə təklif edirsiniz? Milli Məclisin məsuliyyəti nə qədərdir? Biz nə edək ki, bu vəziyyəti dəyişək?”
Dia-az.info xatırladır ki, dünən bu məsələ ilə bağlı fotoları təqdim edən politoloq Elçin Mirzəbəyli yerli KİV-ə bildirmişdi ki, məsələ ilə bağlı baş prokurorluğa müraciət edib:
"Bu şəkillərdə gördüyünüz mənzərə sabiq deputat Əsabil Qasımova məxsus "Pilot-16" şirkətinin Bakı şəhəri, Nəsimi rayonu, Cəlil Məmmədquluzadə küçəsi 134 ünvanında yerləşən, ailə üzvlərimin və doğmalarımın payçı olduğu evdə törətdikləri əməllərin nümunəsidir. Hörmətli Baş prokurordan mülkiyyət hüquqlarımızın qorunmasına yardım göstərməsini xahiş edirəm".
İndi isə aydın olur ki, eyni məsələni Milli Məclisdə qaldıran Qüdrət Həsənquliyev hətta "Ombudsmanın gücü çatacaq məsələ deyil" deyərək vəziyyətin ciddiliyinə də işarə edib.(Dia-az.info)
