"İstər ətrafımdakı insanlar, istərsə də seçicilərim çox gözəl bilirlər ki, vətəndaşı dinləmək, onlara həssaslıq nümayiş etdirmək və problemlərinin həllinə çalışmaq mənim fəaliyyətimdə prioritetdir. Bu mənim iş prinsipimdir!" Bu Milli Məclisin deputatı Jalə Əhmədovanın DİA.AZ-a göndərdiyi müraciətdə yer alıb.
Xanım millət vəkili daha sonra yazır: "Lakin bəzən elə şikayətlərlə üzləşirəm ki, həllində çarəsiz qalıram.

Ədalət mühakiməsinin hakimindən ədalət gözləyən vətəndaşların çarəsizliyi kimi...

Hər birimiz bilirik ki, Azərbaycanda məhkəmə hakimiyyəti müstəqildir və o, hakimiyyətin başqa qollarından asılılığı olmadan həyata keçirilir. Yəni, məhkəmənin işinə müdaxilə etmək yolverilməzdir. Amma bu o demək deyil ki, bəzi məhkəmə sədrləri vəzifələrindən sui-istifadə etməli, məhkəmə prosesləri zamanı vətəndaşa aşağılayıcı münasibət sərgiləməli, yüksək tonla danışmalı və ya işi araşdırmadan birtərəfli mövqedən çıxış edərək qərar qəbul etməlidir!

Məhkəmələrin müstəqil olması onlara bu hüququ verirmi ki, vətəndaşa bu cür davranış nümayiş etdirsin, ən əsası da qeyri-obyektiv qərarlar qəbul etsin və vətəndaşın konstitusion hüquqlarını pozsun?!

Qəbul zamanı seçicilərimin Salyan rayon Məhkəməsinin sədri Muradağa Qasımovla bağlı səsləndirdikləri şikayətlər də məhz bu istiqamətdədir – Muradağa müəllim məhkəmə-hüquq sistemini özününküləşdirib!

Deyəsən M.Qasımov ədalət mühakiməsinin vətəndaşların qanun və məhkəmə qarşısında bərabərliyi əsasında həyata keçirildiyini və məhkəmənin qəbul etdiyi qərarların dövlətin adından çıxarıldığını unudub. Bəs, görəsən vətəndaşa “get, hara istəyisən şikayət et”, deyən Muradağa müəllim, bununla dövlətimizin nüfuzuna xələl gətirdiyini bilirmi? Yoxsa şəxsi mənafeyini daha üstün hesab edir?!

Salyan rayon Məhkəməsinin sədri Muradağa Qasımov unutmasın ki, hər bir məmur xalqın xidmətçisidir!

Mənim isə millətin vəkili olaraq iş prinsipim dəyişməz olaraq qalacaqdır".

Məsələ ilə bağlı dia.az olaraq qarşı tərəfi də dinləməyə hazırıq...