Azərbaycanda koronavirusa yoluxanların sayının artmasına baxmayaraq, ölkədə koronavirus infeksiyası ilə mübarizə tədbirlərində iştirak edən həkimlərə ödənişlərin həcmində azalma müşahidə olunur. İcbari Tibbi Sığorta üzrə Dövlət Agentliyindən (İTSDA) verilən məlumata görə, COVID-19 ilə mübarizədə səhiyyə işçilərinin sayı yoluxmuş xəstələrin sayında artım dinamikasına uyğun olaraq tənzimlənir.
“Nazirlər Kabinetinin qərarına uyğun olaraq, bu kateqoriyadakı tibb və qeyri-tibb işçiləri üçün iş vaxtlarına nisbətdə əmək haqqının 3-5 misli miqdarında təcili müavinətlər verilir” – deyə Agentlikdən bildirilib.
AYNA problemlə aydınlıq gətirməyə çalışıb.
Tibb elmləri doktoru, professor Adil Qeybullanın dediyinə görə, koronavirus infeksiyasına qarşı mübarizə tədbirlərində iştirak edən həkimlər üçün təcili müavinətlərin yalnız işlənmiş saatlarla mütənasib olaraq ödənildiyi ifadələri heç bir məntiqə sığmır: “Unutmayın ki, işləyən saatlardan asılı olmayaraq həkimlər koronavirus virusuna yoluxa bilərlər. Axı onlar daim koronavirus virusuna yoluxmuş xəstələrə baxmaq məcburiyyətindədirlər. Bu vaxta qədər, təxminən yüz həkim koronavirusla mübarizədə həyatını itirib”.
Təcili və Təxirəsalınmaz Tibbi Yardım Klinikasının cərrahı Ədalət Rüstəmov da əməkdaşımızla söhbətində deyilənlərin reallıq olduğunu təsdiqləyib: “Nazirlər Kabinetinin koronavirus infeksiyasına qarşı mübarizədə iştirak edən tibb və qeyri-tibb işçiləri üçün maaşların 3-5 misli miqdarında təcili artımların ödənilməsinə dair qərarı icra edilmir. Mən bu tədbirlərdə birbaşa iştirak etmişəm. Mənə yalnız əmək haqqının 2 misli miqdarında müavinət verildi. Bəzilərində isə daha da az oldu”.
Xatırlatmaq istərdik ki, Nazirlər Kabinetinin 25 mart 2020-ci il tarixli qərarına əsasən, təcili tibbi yardım xidmətləri göstərən tibb işçiləri aylıq rəsmi (tarif) maaşının 4 misli miqdarında mükafat almalıdırlar. Bu fərmana uyğun olaraq xəstələrə stasionar tibbi xidmət göstərən işçilər aylıq rəsmi əmək haqqında beşqat artım hüququna malikdirlər.
Nazirlər Kabinetinin qərarına əsasən, həkimlərə ayrılan müavinət niyə ödənilmir? Sorğuza cavab olaraq Tibbi Ərazi Bölmələrini İdarəetmə Birliyinin (TƏBİB) mətbuat katibi Elnarə Baxışova deyib ki, bu məsələnin onlarla heç bir əlaqəsi yoxdur: “Mükafat məsələsi Nazirlər Kabineti yanında İcbari Tibbi Sığorta üzrə Dövlət Agentliyi tərəfindən tənzimlənir”.
İTSD-nın İctimaiyyətlə əlaqələr şöbəsinin müdiri Aynurə Əhmədovanın isə cavabı belə olub ki, tibb müəssisələrinin rəhbərləri onlara koronavirusla mübarizədə iştirak edən həkimlərin siyahısını təqdim edirlər: “Agentliyimiz bu qurumların hesablarına pul köçürür. COVID-19 infeksiyasına qarşı mübarizədə iştirak edən bir tibb işçisi üçün maaş artımı, koronavirusla mübarizədə keçirdiyi iş saatları ilə mütənasib olaraq tibb müəssisəsi rəhbərləri tərəfindən müəyyən edilir. Qeyd etmək lazımdır ki, işçinin ödəyəcəyi əmək haqqından bütün tutulmalar ümumi məbləğdən aparılır”.
Belə çıxır ki, ödənişlərdən narazı olan həkimlər İTSDA-nı günahlandırmamalı, problemin kökünü çalışdıqları xəstəxananın mühasibatlığında axtarmalıdırlar.
