“COVİD -19” pandemiyası bir sıra dünya ölkələrində yenidən alovlanıb. Xüsusən də Avropa ölkələrində 2-ci dalğa ilə bağlı xəbərdarlıqlar edilir. Bəzi ölkələrdə hələ də aktiv olan pandemiyaya qarşı mübarizə tədbirləri davam etsə də,virusun yayılmasına nəzarət edən ölkələr yeni dalğadan ehtiyatlanır.
Azərbaycanda pandemiya dövründə görülən doğru addımların nəticəsində ürəkaçan mənzərə müşahidə olunur. Gündəlik koronavirusa yoluxanların sayı 100-dən aşağı düşüb.
Tibb eksperti , professor Adil Qeybulla da "Sherg.az"a açıqlamasında xəstəxanalara müraciət edən xəstələrin sayının azalması, sağalanların sayının çoxalmasını müsbət dinamika kimi dəyərləndirib:
"Amma evdə müalicə olunanları və qeydiyyatda olmayan xəstələri unutmamalıyıq. Bu mənada karantin rejiminin tədricən yumşalması başadüşüləndir. Pandemiya tam məhv olmadığı üçün rəqəmlərin azalması bizi tam arxayınlaşdırmamalıdır".
Dünyada alovlanan ikinci dalğanın Azərbaycan üçün nə dərəcə təhlükəli olduğuna gəldikdə isə professor deyib ki, biz ancaq payız ayı üçün ikinci dalğadan danışa bilərik. Hələlik isə birinci dalğanın fəsadlarını aradan qaldırmaq barədə düşünməliyik:
"Payızda mövsümi xəstəliyə yoluxma halları da müşahidə edildiyindən insanlar bir müddət karantin davranışları, yəni sosial məsafənin qorunması, maskanın taxılması və əllərin dezinfeksiya edilməsi kimi qaydalara payızın sonuna kimi əməl etməlidirlər".
