Vətən Müharibəsi qaziləri onlara xəstəxanada düzgün diaqnoz qoyulmadığını iddia ediblər.
Yeniavaz.com xəbər verir ki, bununla bağlı jurnalist Xatun Etibarqızı feysbuk hesabında video paylaşıb.
Videoda müraciət ünvanlayan Vətən Müharibəsi qazisi Allahverdiyev Ramazan bildirir ki, onun aldığı xəsarətlə bağlı xəstəxanada düzgün diaqnoz qoyulmayıb:
“Sentyabr ayının 21-də könüllü olaraq ordu sıralarına qoşulub və döyüşlərdə iştirak etmişəm. Ağdərə uğrunda gedən döyüşlər zamanı yaralandım. Beyin travmasına görə məni hospitala apardılar. Hospitalda müalicə olunduqdan sonra tərxis olundum. Daha sonra isə vəziyyətim pisləşdi və “Papanin”ə müraciət etdim. “Papanin”dən məni Respublika Psixiatriya Xəstəxanasına göndərdilər. Orada 10 gün yatdım. Mənə “stresə qarşı kəskin reaksiya” diqanozu qoyuldu. Lakin “Papanin”də mənə “baş-beyin toxumasının əzilməsi” diaqnozu qoyulub. Psixiatriya Xəstəxanasında pul vermədiyim üçün mənə bu diaqnozu qoyublar. Bu gün “Papanin”də özümü yandırmaq üçüb benzin tökdüm, əlimdən aldılar. Amma sabaha kimi mənim diaqnozumu düzgün yazmasalar, gedib Müdafiə Nazirliyinin qarşısında benzin töküb özümü yandıracağam. Necə ki, Psixiatriya Xəstəxanasında bizimlə bir yerdə müalicə alan qollarını doğradı, baxmadılar, bu gün səhər intihar etdi. Sabah isə mən də o oğlan kimi olacağam. Kirayədə yaşayıram”.
O, dəfələrə “YAŞAT” Fonduna müracət etdini lakin yanlız əlillik dərəcə olduğu halda yardım edəcəklərini bildirib: “YAŞAT” Fonduna müracət etdim ki, mən kirayədə qalıram və evdən çıxardırlar məni. Mənə dedilər ki, əlillik dərəcən var? dedim yox. Dedilər ki, əlil olanda sənə kömək edərik. Mən indi ayağımı, kəsib atım?”
Videomüraciət zamanı Səfərov Emin Nizami oğlu və yanındakı digər danışıq qabiliyyətini müəyyən qədər itirmiş qazi də (kadrlarda adı hallandırılmır)eyni problemi yaşadıqlarını bildiriblər. Bildirilir ki, adı çəkilməyən qazinin Tərtərdəki evi müharibə zamanı erməni vandalları tərəfindən yararsız hala düşüb və buna görə də gedəcək yeri yoxdur.
“YAŞAT” Fondundan Yeniavaz.com-a verilən məlumatda bildirilir ki, sözügedən qazilərlə əlaqə saxlanılıb, lakin onlar tərəfindən müvafiq tibbi sənədlər təqdim olunmayıb:
“Şəhid ailələri və Vətən müharibəsində yaralananların hər biri diqqət mərkəzimizdədir. Onlarla bağlı müraciətlərin hər birinə həssaslıqla yanaşılılır. Onlarla əlaqə saxlanılır, problemləri araşdırılır və xərclər "YAŞAT" Fondu tərəfindən qarşılanır. Qeyd etdiyiniz yaralılarımızla "YAŞAT" Fondunun əməkdaşları tərəfindən əlaqə saxlanılıb. Lakin onlar tərəfindən müvafiq tibbi sənədlər təqdim olunmayıb.
Allahverdiyev Ramazanla əlaqə saxlanılıb. Məişət şəraitinin yaxşılaşdırılması ilə bağlı köməklik istəyib, lakin epikriz təqdim edə bilməyib. Emin Səfərovla da əlaqə saxlanılıb, Fondun əməkdaşları onun evində də olublar. Yaralımızın həyat yoldaşı ilə yanvarın 10-u tarixindən dəfələrlə danışılıb, onun tərəfindən vəziyyətin çox gərgin olduğu bildirilib. Fondun əməkdaşları onu tibb müəssisələrinə yönləndirmək istəsə də, israrla Hərbi Hospitala aparılmasını istəyiblər. Müvafiq danışıqlardan sonra o, tibb müəsissinə yönləndirilsə də, Emin Səfərov 3 gün sonra oranı özü tərk edib. Və hələ də onunla bağlı müvafiq epikriz təqdim edilməyib. Əhmədov Nəcməddin isə atasının bank kreditinin ödənilməsi ilə bağlı müraciət edib və müvafiq qayda izah olunub. O, həmçinin müalicəsi ilə bağlı dərmanlarının alınması istəyini bildirib və ona dərmanların pulsuz təqdim olunduğu apteklərin siyahısı barədə məlumat verilib. Bu barədə həmin şəxsə məlumat verərkən o artıq dərmanlarla təmin olunduğu barədə özü məlumat verib. Həmçinin bu şəxs də epikriz təqdim etməyib.
Fond onların hər birinin xərclərini qarşılamağa hazırdır”.