Hökumətin iqtisadi blokunun genişləndirilmiş iclasında sosial müdafiə sferasında vaxtilə hökm sürən özbaşınalığa görə Prezident İlham Əliyevin səsləndirdiyi tənqidlərdən əsas pay sabiq əmək və əhalinin sosial müdafiəsi naziri Füzuli Ələkbərova düşür.
Dövlət başçısı çıxışında sosial müdafiə sferasında mövcud vəziyyəti dəyərləndirərək, ötən ilin aprelində əmək və əhalinin sosial müdafiəsi naziri təyin olunmuş Sahil Babayevin fəaliyyətini təqdir edib:
"Sosial müdafiə sahəsində nə qədər pozuntular olub. Yeni nazir Sahil Babayev bunları üzə çıxardı və çox ciddi islahatlar aparır”.
Prezidentin bu yanaşması "yeni kadrlar” sırasında olan nazir Sahil Babayevin sələflərindən fərqli olaraq, öz vəzifəsinin öhdəsindən gəldiyinin göstəricisidir.
Ancaq hər kəsə məlumdur ki, ölkədə ən problemli və vətəndaşların şikayətlərinin ardı-arası kəsilməyən sahələrdən biri məhz əhalinin sosial müdafiəsi sferası olub. Ancaq əlbəttə ki, digər sahələr kimi, sözügedən sferada da problemlər bir gündə yaranmadığı kimi, onların aradan qaldırılması da qısa müddətin işi deyil. Necə ki, Ələkbərovdan sonra 5 il o postu tutmuş Səlim Müslimov da sələfinin yaratdığı "bataqlıq”da baş çıxara bilmədi.
Problemlərin qalaqlanması isə daha çox o sahəyə 7 il (2006-13) rəhbərlik etmiş Əmək və Əhalinin Sosial Müdafiəsi Nazirliyinin keçmiş "şef”i Füzuli Ələkbərovun dövrünə təsadüf edir. Bu da səbəbsiz deyil. Çünki Azərbaycana neft pullarının daxil olması və əhalinin sosial müdafiəsinin gücləndirilməsi istiqamətində addımların atılması həmin illərdən başlayır.
Ünvanlı sosial yardımların ayrılması, təqaüdlərin hesablanması, əlillərin müəyyənləşdirilməsi və başqa məsələlərdə yol verilən ciddi pozuntular məhz Füzuli Ələkbərovun nazirliyi dönəmində vüsət alıb. Xüsusilə, ünvanlı sosial yardımların verilməsi zamanı Nazirlik əməkdaşlarının "50-nin 50-yə” sistemini tətbiq etmələri dövlətin nüfuzuna vurulan rəzil zərbə kimi dəyərləndirilir.
Ələkbərovun və ailə üzvlərinin dövlətçiliyə "töhfə”sinin zirvəsi isə 2013-cü il İsmayıllı hadisələri oldu. Qardaşının icra başçısı olduğu İsmayıllını şəxsi mülkləri olaraq görən Ələkbərovun ailə üzvlərinin harın davranışları rayonda real üsyyan şəraiti yaratmışdı. Yalnız ölkənin ali rəhbərliyinin vaxtında müdaxiləsi və Ələkbərovların görəvdən alınmaları İsmayıllıda gərginliyin böyüməsinə imkan vermədi.
Lakin Ələkbərov vəzifəsinin itirdikdən sonra da "nazir hikkəsi”ndən əl çəkməyib və səlahiyyət sahibi olduğu dövrdə qurduğu biznes "imperiya”sını genişləndirmək üçün qanunsuz əməllərini davam etdirməkdədir.
Bu məqsədlə sıravi vətəndaşların həyatını cəhənnəmə çevirən, biznes rəqiblərini sıradan çıxarmaq üçün bütün vasitələrə əl qatan Ələkbərov Bakının mərkəzi ərazilərində bir neçə yeri zəbt edərək, vergidən yayınmaqla, qanunsuz avtoparklar açıb, sərvətini artırmaqdadır.
Bundan başqa, sabiq nazirin harınlığı o həddə çatıb ki, Sahil qəsəbəsində onun villasından hündür evin tikilməsini belə qadağan etmişdi. Qəsəbə sakinləri Ələkbərovun bu qanunsuz məhdudlaşdırmaları nəticəsində bir addımlığında olan dənizə yaxın düşə bilmirlər.
Keçmiş nazirin dözülməz əməlləri qəsəbə sakinlərinin və müstəqil iş adamlarının səbr kasasını daşırsa da, Ələkbərov hələ ki "toxunulmazlıq” ovqatındadır. Görünür, qanunsuz hərəkətlərini davam etdirən keçmiş nazir "İsmayıllı qiyamı”nı təkrarlamayana qədər layiq olduğu cəzanı almayacaq.
www.yenicag.az
