Sabiq vergi generalı Habil Məmmədovun yeni vəzifədə yarıtmaz fəaliyyəti nəticəsində Əmanətlərin Sığortalanması Fondu (ƏSF) iflic vəziyyətdədir.
Yenicag.az xəbər verir ki, etibarlı mənbənin məlumatına görə, “akula” ləqəbli H.Məmmədov ƏSF-yə icraçı direktorun müşaviri təyin olunandan burada Vergilər Nazirliyində tətbiq etdiyi qanunlarla işləyir.
Hakimiyyətdəki bir sira dairələrə arxalanan Məmmədov Vergilər Nazirliyindən qovulmuş bir sıra özünü yaxın kadrlarını Fonda yerləşdirib və burada da şəxsi maraqlarına xidmət edən mexanizmi işə saldı.
Məmmədova ƏSF-nin əsas fəaliyyətlərindən hesab olunan bağlanmış bankların kreditlərini yığılması tapşırılmışdı ki, bu vəsait də əhalinin banklarda batmış pullarının qaytarılmasına yönəlməli idi. Amma “akula” ilk növbədə özünə yaxın, vergilər sistemində rüşvətxorluğa qurşanmış, ölkədə biznes mühitini uçuruma sürükləyən kadrları yüksək maaşla Fonda və bağlanmış banklara işə götürdü. Bundan başqa, Məmmədov öz qohumlarını da burada vəzifə ilə təmin etdi. Bu kadrların bir çoxunun isə nəinki bank sistemindən, heç iqtisadiyyatdan başı çıxmır. İllərlə bank sektorunda işləyən kadrlar səriştəsiz rəhbərliyin mənasız tapşırıqlarını yetirə bilmədiklərinə görə əlacsız qalib öz iş yerlərini tərk etməli olur.
Mənbənin məlumatına görə, köhnə kadrları təmizləmək üçün vergi generalı tez-tez işçilər arasında rotasiya aparır. İllər öncə bağlanmış “Atrabank” və yaxud “Bank Standard”ın kredit yığımı ilə məşğul olan işçiyə “Dəmirbank”, “Texnikabank”nın işləri tapşırılır. Nəticədə öz yerində olmayan və “domokl qılıncı” altında işləyən kadr öz ərizəsi ilə işdən çıxmağı üstün tutur. Məmmədov isə boşalan yerə öz qohumlarını yerləşdirir. Yeni kadrlara isə gözün üstündə qaşın var deyən yoxdu – istədikləri vaxt işə gəlirlər, istədikləri vaxt gedirlər.
Bu yarıtmaz fəaliyyətin nəticəsidir ki, bağlanmış bankların kredit yığımı ötən ilə nisbətən 3 dəfədən də çox azalıb. Amma nəzərə almaq lazımdır ki, bu rəsmi rəqəmlərdir, qeyri-rəsmi ödənişlər isə Məmmədov və əlaltılarının cibinə axır. Halbuki, “akula”nın təyinatından əvvəl bu sahədə işlər artan dinamika ilə gedirdi, kreditlətin yığımında əməlli irəliyişlərə nail olunmuşdu.
Kredit yığımının azalması isə məhz bağlanmış banklarda pulunu itirən vətəndaşlara təsir edir. Çünki əmanətçilərin illərlə yığdığı vəsaitin qaytarılmasına ümidləri puç olur. Vətəndaş da üz tutur yuxarı orqanlara, ümidini prezident İlham Əliyevdə görür, bəziləri Prezident Administrasiyasının qarşısında aksiya keçirir (“Bank Standard”ın əmanətçiləri bir neçə belə aksiya keçirib), nəticədə ümumiyyətlə hakimiyyətdən narazı düşür.
Amma Məmmədov heç də işin keyfiyyətinin marağında deyil. Şəxsi xəzinəsini doldurmağı əsas götürən “vergi generalı” sadə vətəndaşların problemləri maraqlandırmır. Əksinə yuxarı eşelonlardakı havadarlarına arxalanan “akula” özfəaliyyətini genişləndirməyə çalışır./İnterpress/
