Azərbaycan Dövlət Mədəniyyət və İncəsənət Universitetinin bir qrup müəllimi ölkə Prezidenti İlham Əliyev müraciət edib.

Müraciətin surətini Modern.az-a da ünvanlayan müəllimlər bildiriblər ki, 1987-ci ildə Nazirlər Kabinetinin 20/396-cı qərarı ilə Universitetin 61 nəfər əməkdaşına Pirallahı rayonu Dübəndi bağ massivində hər nəfərə 6 sot olmaqla torpaq sahəsi ayrılıb. Lakin həmin il müəllimlər onlara ayrılan torpaq sahəsini ala bilməyiblər.

“Müəyyən səbəblərə görə Universiteti tərk edən işçiləri qeydiyyata almadan, siyahıda qalan 27 nəfərin adına yenidən sənəd toplanıb, 2011-ci ildə torpaq və xəritəçəkmə məkanına təhvil verildi.

Lakin bizə verilən torpaq sahəsi yenə də əlçatmaz oldu.

Müəyyən olundu ki, 2016-cı ildən başlayaraq bizim seçdiyimiz bağçılıq-yoldaşlıq təsərrüfatının sədri İsmayılov Şöhrət Əhməd oğlu keçmiş laborant Əzizova Vahidə Seyfəddin qızı ilə birləşərək, 27 nəfər işçinin yerinə 61 nəfərin adını öz xeyrlərinə dəyişdirərək, həmin sahələri qeyri-qanuni yolla satmaqla məşğul olublar.

Torpaq sahələrinə baş çəkdikdə aydın oldu ki, hasara alınmış bir çox yerlərdə tikinti aparılıb”.

Müraciət müəlliflərinin sözlərinə görə, müəllimlər aidiyyatı dövlət qurumlarına ərizə ilə müraciət ediblər.
Ancaq dövlət qurumlarından müsbət bir nəticə görmədikdə, ölkə başçısına müraciət etməyə məcbur olublar.
Narazı müəllimlər eyni zamanda Birinci vitse-prezident Mehriban Əliyevaya, Daxili işlər naziri Ramil Usubova teleqram göndəriblər.

Nəhayət 25 aprel 2019-cu il tarixində Əmlak Məsələləri Dövlət Komitəsi Aparatının rəhbəri Azər Bəşirov narazı müəllimlərə cavab verib:
“Azər Bəşirov bu işdə günahkar olanların sanki müdafiəsində dayanmış və bununla da problemin həllini el dili ilə desək dağa dirəmişdir. Bu cavabdan bizə aydın olur ki, cinayətə əl atmış İsmayılov Şöhrət Əhməd oğlu, eləcə də, Əzizova Vahidə Seyfəddin qızını dolayısı yolla təmizə çıxarmaq istəmişdir”.

Mədəniyyət və İncəsənət Universitetinin müəllimləri indi ölkə başçısından məsələni nəzarətə götürməyi xahiş edirlər.

Müraciəti aşağıdakı şəxlər imzalayıblar:


Əlizadə Məryəm, Əməkdar İncəsənət Xadimi, Sənətşünaslıq elmləri doktoru, professor

Qasımov Məmmədsəfa, Xalq artisti, professor

Şükürov Azad, Əməkdar artist, dosent

Abdullayeva Yaqut, Əməkdar artist, dosent

Quliyeva Gülsabah, Əməkdar artist, dosent

Bayramov Ağalar, Əməkdar artist, dosent

Əliyeva Zərifə, pedaqogika üzrə fəlsəfə doktoru, dosent

Hüseynov Nadir, dosent

Mehdiyeva Yaqut, dosent

Abbasova Fazilə, sənətşünaslıq üzrə fəlsəfə doktoru, dosent

Qubadova Məsməxanım, sənətşünaslıq üzrə fəlsəfə doktoru, dosent

Cabbarova Tamilla, dosent

Kərimova Alla, Baş laborant

Kərimova Gülfarə, baş laborant

Kərimova Fəxriyyə, tədris şöbəsinin müdiri

Səfərova Mahi, müəllim

Qocayev Qabil, Qarabağ müharibəsi veteranı.