Lemkin İnstitutu Azərbaycanla bağlı absurd iddia ilə çıxış edib. “Soyqırım” terminini siyasi ədəbiyyata gətirən Polşa əsilli yəhudi hüquqşünas Rafael Lemkinin adı ilə yaradılmış “Lemkin Soyqırımların Qarşısının Alınması İnstitutu” Azərbaycana növbəti dəfə “qırmızı bayraq” xəbərdarlığı verib. Qurumun məlumatında qeyd olunub ki, Azərbaycan yaxın günlərdə və ya həftələrdə Ermənistana hücum edəcək, ölkənin cənubunu tutacaq.
Buna görə təşkilat beynəlxalq təşkilatları və dövlətləri Azərbaycana təzyiq göstərməyə, Ermənistanda, Qarabağda ermənilərin varlığını gücləndirmək üçün səyləri artırmağa çağırıb.
Sözügedən İnstitutun Ermənistanla, eləcə də xaricdəki erməni diasporu ilə əlaqələri, Azərbaycana münasibətdə qeyri-obyektiv olduğu məlumdur. Lakin ekspertlər Lemkin İnstitutunun bu məlumatı sıradan ortaya atılmadığı qənaətindədirlər. Belə ki, ötən ilin sentyabr döyüşlərindən, yəni Ermənistanın sərhəddəki təxribatından əvvəl də Lemkin İnstitutu “qırmızı bayraq” xəbərdarlığı etmişdi. Ekspertlər qeyd edirlər ki, bundan sonra ssenariyə uyğun şəkildə sərhəddə təxribat törədildi, Azərbaycan məcburi cavab tədbirləri həyata keçirdi. Bununla Ermənistan Azərbaycana qarşı təzyiqlərə çağırış etdi və müəyyən siyasi nəticələr əldə edə bildi. Ona görə də, gözlənilir ki, Ermənistan sərhəddə növbəti təxribata hazırlaşır.
Mövzu ilə bağlı AYNA-nın suallarını cavablandıran təhlükəsizlik məsələləri üzrə ekspert İlham İsmayıl Lemkin İnstitutu erməni diasporası ilə işləyən, ümumiyyətlə ermənilərin qurumudur:
- Lemkin İnstitutu 44 günlük müharibədə də, ondan əvvəl də, sonra da ancaq ermənilərin marağına xidmət edib. İnstitutun mütəmadi olaraq Azərbaycanı şantaj edib, əməkdaşları da əsasən ermənilərdən və ruslardan ibarətdir. Ona görə də belə məlumat yayaması təbiidir. Qərbin müəyyən dairələri erməni lobbisinin təsiri ilə Azərbaycanı “etnik təmizləmə” aparan ölkə, aqressiv dövlət kimi göstərməyə çalışır ki, Lemkin İnstitutu kimi QHT-lər də bu siyasətdə alət rolunu oynayırlar.
Lemkin İnstitutunun bu məlumatı ilə bağlı ABŞ Dövlət Departamentinin mətbuat katibinə sual ünvanlanıb. Dövlət Departamentinin nümayəndəsi isə bildirir ki, ABŞ Ermənistanın ərazi bütövlüyünü və suverenliyini dəstəkləyir, bundan sonra da dəstəkləyəcək. Bunu erməni mediası elə işıqlandırır ki, sanki Dövlət Departamenti ermənilərin xeyirinə ayrıca bəyanat verib. Yəni demək istəyirəm ki, Lemkin İnstitutunun bu məlumatları əsasında informasiya manipulyasiyası aparırlar.
Bunların məqsədləri odur ki, Azərbaycana qarşı təzyiqlər artsın, bəlkə Qarabağda “Kosovo variantı” edə bilsinlər. Fikirləşirlər ki, Rusiya sülhməramlıları bölgədən gedir, BMT-nin təhriki ilə bölgəyə beynəlxalq missiya daxil olacaq, ardınca beynəlxalq hərbi kontingent daxil olur və s.
- Bu, mümkündürmü?
- Əlbəttə, mümkün deyil. Buna Azərbaycan icazə verməyəcək. Arzuları budur ki, beynəlxalq aləm Azərbaycanı məcbur edəcəklər ki, bu varianta razı olsun. Baxın, “Azadlıq” radiosunda Qarabağdan getmiş erməni sakinləri ilə mütəmadi şəkildə müsahibələr edirlər, onların geri qayıtmalarını soruşurlar. Ermənilər də bildirirlər ki, rus sülhməramlılarına inanmırlar, güvənmirlər. Ardınca bildirirlər: “Avropa sülhməramlıları Qarabağda olsa, bölgəyə qayıdarlar”. Belə bir ssenari işə salıblar. Dəqiq deyirəm, Ağdərədən gedən erməni heç Avropanın harada olduğunu bilmir. Demək ki, bu insanlar əvvəldən təlimatlandırılıblar ki, belə danışsınlar.
Yenə deyirəm, bu, Azərbaycana qarşı qarayaxma kampaniyasının tərkib hissəsindən başqa bir şey deyil. Əlbəttə, rəsmi Bakının buna qarşı cavabı olmalıdır.
- Söhbət hansı formada cavabdan gedir?
- Əslində cavab da verilir, bu iddialar Bakıdan təkzib olunur. Söhbət diplomatik formada cavabdan gedir. Eyni zamanda, bu təzyiqlərin Azərbaycana ciddi təsirlərinin olacağını düşünmürəm. Biz öz işimizi görməliyik. Sülh sazişi istiqamətində diplomatik təmaslar artırılmalıdır.
- İndi danışıqlar faktiki olaraq donmuş vəziyyətdədir. Bu halda sülh sazişinin perspektivi varmı?
- Məndə olan məlumatlara görə və təhlillərimizə əsasən deyə bilərəm ki, ilin sonunadək sülh sazişi imzalanmasa da, hansısa ilkin çərçivə sazişi imzalana bilər. Gələn ilin ilk altı ayı ərzində isə sülh müqaviləsinin imzalanması mümkündür.
Ümumiyyətlə, məsələnin uzanması bizim xeyirimizə deyil. Nə tələsik sülh sazişinə ehtiyac var, nə də gecikmək lazımdır. Tələsik sülh sazişinə o mənada ehtiyac yoxdur ki, Azərbaycanın maraqlarına uyğun olmayan hansısa şərtlər müqavilədə əksini tapmamalıdır. Amma məsələ uzandıqca, Bakıya yanaşmalar da dəyişir. Lemkin İnstitutu tipli beynəlxalq təşkilatlar anti-Azərbaycan təbliğatı aparacaqlar, bəzi ölkələr təzyiqlərini artıracaqlar.
- Ermənilər Qarabağa qayıtmaq istəmirlərsə, Qərb dairələrinə nə düşüb ki, onların qayıdışı barədə ajiotaj yaradırlar?
- Bu gün Cənubi Qafqaz uğrunda savaş gedir. Beynəlxalq güclər regionda təsiri ələ almaq uğrunda mübarizə aparırlar. Bölgədə kiçik də olsa, gərginlik ocağı qaldıqca, beynəlxalq güclərin təsir etmək, nüfuz etmək imkanları da qalır. Baxın, Fransa kimi böyük dövlət Qafanda konsulluq açmaq istəyir. Eləcə də, Rusiya artıq konsulluq açır. Ermənistan xırda dövlətdir, nəinki konsulluğa, heç bəlkə səfirliyə də ehtiyac yoxdur. Qərb, xüsusilə, Fransa Ermənistanda Rusiyanı əvəzləmək istəyir. Amma buna nail ola bilməyəcək. Çünki Rusiya Ermənistandan çəkilib gedəsi deyil.
- Lemkin İnstitutu keçən il də “qırmızı bayraq” elan etmişdi, sonra sərhəddə Ermənistan təxribat törətdi. Ola bilərmi ki, Ermənistan bu dəfə də sərhəddə növbəti dəfə təxribat törətsin?
- Ola bilər ki, Azərbaycanı günahlandırmaq, sülh prosesini uzatmaq üçün hansısa təxribatlara əl atsınlar. Fransanın Ermənistanı silahlandırması faktı da mövcuddur. Amma Ermənistanın öz istəyi ilə təxribat törədəcəyi az ehtimal edilir. Çünki Ermənistanın Azərbaycana qarşı təxribatına sərt cavab veriləcəyini İrəvanda yaxşı anlayırlar. Onu da anlayırlar ki, təxribata cavab veriləcəyi təqdirdə Azərbaycana qarşı qınaq olsa da, ciddi nəticəsi olmayacaq. Təxribat olacaqsa, cavab veriləcək, amma Ermənistan ərazisinə Azərbaycan Ordusunun girmək niyyəti yoxdur. Azərbaycan işğalçı dövlət deyil. Dəfələrlə ən yüksək səviyyədəı bəyan edilib: Azərbaycan Zəngəzura qayıdacaq, amma top-tüfənglə yox, dinc yolla.
