96 saylı Goranboy-Naftalan Seçki Dairəsindən 2020-ci ildə deputat seçilən Anar Məmmədovun şəxsən rəhbərlik etdiyi “Amazon” şikəti Qarabağdakı tenderlərə özünü soxuşdura bilib. Sözügedən şirkət ayrı-ayrı şəxslərdən texnika alaraq işlədib, dövlətdən pulunu mənimsəyib, iş bitdikdən sonra isə texnika sahiblərinə qırıq-salxaq texnikaları təhvil verib, qarşılığında isə heç bir ödəniş etməyib.
Tribuna.Az xəbər verir ki, deputat kimi öz səlahiyyətlərindən xəbəri olmayan bu şəxs qaynatası ilə birgə fırıldaqla məşğuldur. Surətlə tikinti maqnatına çevrilməkdə olan millət vəkili bu işi həm də fırıldaq yolu ilə görür. Qarabağda görülməli olan müəyyən işlər üçün dövlət büdcəsindən küllü miqdarda pul mənimsəyən A.Məmmədov işləri ayrı-ayrı şəxslərin texnikası hesabına həyata keçirir.
Məlumata görə, görülməli olan işlərlə əlaqədar bir şəxsə kran sifariş verib və bunun üçün rəsmi müqavilə bağlanıb, aylıq icarə də müəyyən edilib. 4 ay sonra isə A.Məmmədovun adamları artıq istifadə etmədikləri kranı aldıqları şəxsin həyətinə ataraq, aradan çıxıblar. Rəsmi müqavilə bağlansa da, kran sahibinə heç bir ödəniş ediməyib.
Biznes fəaliyyəti ilə məşğul olan millət vəkilinə bu işlərdə qaynatası da köməklik edir. Gənc bir millət vəkilinin bu cür özbaşınalığı birbaşa YAP-dakı islahatları puç edir, yeni, xüsusilə də gənc kadrlara olan inamı sıfıra endirir.
Tribuna.Az
