COVİD-19 pandemiyasına qədər Mahmudova İrandan gətirdiyi mallarla alver edib həm vaxtına qənaət edirdi, həm də ailəsini yaxşı dolandırırdı. Bir il yarımdan çoxdur ki, o, Astaranın mərkəzi bazarında hazırladığı pendir, şor, turşunu satır. Qapanmadan əvvəl satıcılar malları yerli qiymətlərə nisbətdə İrandan daha ucuz alıb, bazarda münasib qiymətə sata bilirdilər. İranla quru sərhədlərinin bağlanması xəbəri satıcıları pis vaxtda haqlayıb və tədarüksüz, günlük qazanca çalışan onlarla ailənin gəlirini sual altında qoyub. Onların əksəriyyəti pandemiya dövrü üçün nəzərdə tutulan 190 manatlıq yardımı da ala bilməyib.
