Baş nazir Əli Əsədov “İnsan orqan və toxumalarının donorluğu və transplantasiyası haqqında” Qanunun tətbiqi barədə” Azərbaycan Respublikası Prezidentinin fərmanının icrasının təmin edilməsi haqqında sərəncam imzalayıb.

Sərəncama əsasən, Ədliyyə Nazirliyi Səhiyyə Nazirliyi, İcbari Tibbi Sığorta üzrə Dövlət Agentliyi və icra prosesində müəyyən ediləcək digər aidiyyəti dövlət orqanları (dövlətin hüquqi şəxsləri) ilə razılaşdırmaqla:

Azərbaycan Respublikası qanunlarının və Azərbaycan Respublikası Prezidentinin aktlarının “İnsan orqan və toxumalarının donorluğu və transplantasiyası haqqında” Qanuna uyğunlaşdırılması ilə bağlı təkliflərini üç ay müddətində Nazirlər Kabinetinə təqdim etməlidir,

Nazirlər Kabinetinin normativ hüquqi aktlarının Qanuna uyğunlaşdırılması ilə bağlı təkliflərini üç ay müddətində Nazirlər Kabinetinə təqdim etməlidir,

Qanunun pozulmasına görə məsuliyyət növlərini müəyyən edən qanun layihəsi ilə bağlı təkliflərini üç ay müddətində Nazirlər Kabinetinə təqdim etməlidir.

Səhiyyə Nazirliyi İcbari Tibbi Sığorta üzrə Dövlət Agentliyi, Ədliyyə Nazirliyi, Dövlət Gömrük Komitəsi və icra prosesində müəyyən ediləcək digər aidiyyəti dövlət orqanları (dövlətin hüquqi şəxsləri) ilə razılaşdırmaqla:

Donor orqanların transplantasiyası metodu ilə müalicə zərurətinin təcililik statusuna dair meyarları ilə bağlı təkliflərini üç ay müddətində Nazirlər Kabinetinə təqdim etməlidir,

Donor orqanların götürülməsi, hazırlanması, saxlanması, daşınması və transplantasiyası qaydasının layihəsini üç ay müddətində Nazirlər Kabinetinə təqdim etməlidir,

“Donorlar, resipiyentlər və donor orqanların vahid dövlət informasiya bazası”nın Əsasnaməsinin layihəsini üç ay müddətində Nazirlər Kabinetinə təqdim etməlidir;

Qanuna uyğun olaraq resipiyentin sağlamlığı üçün təhlükə törədən xəstəliklərin siyahısı ilə bağlı təkliflərini üç ay müddətində Nazirlər Kabinetinə təqdim etməlidir;

2.5. Qanunun 33.3-cü maddəsinə uyğun olaraq transplantasiya məqsədilə donor orqanların idxalı və ixracı qaydasının layihəsini üç ay müddətində Azərbaycan Respublikasının Nazirlər Kabinetinə təqdim etsin;

Donor orqanların götürülməsi, hazırlanması, saxlanması, daşınması, idxalı və ixracını həyata keçirən tibb müəssisələrinin siyahısı ilə bağlı təkliflərini üç ay müddətində Nazirlər Kabinetinə təqdim etməlidir;

Donor orqanların transplantasiyasını həyata keçirən ixtisaslaşdırılmış tibb müəssisələrinin siyahısı ilə bağlı təkliflərini üç ay müddətində Nazirlər Kabinetinə təqdim etməlidir;

Qanuna uyğun olaraq xəstəliyi olan şəxsin transplantasiyaya ehtiyacının olub-olmamasının müəyyən edilməsi üçün tibb müəssisəsinə göndərişin və tibb müəssisəsinin həkim komissiyasının qərarının forması ilə bağlı təkliflərini üç ay müddətində Nazirlər Kabinetinə təqdim etməlidir;

Qanuna uyğun olaraq resipiyentin gözləmə vərəqəsinin formasını və tərtib olunma qaydası ilə bağlı təkliflərini üç ay müddətində Nazirlər Kabinetinə təqdim etməlidir.

Səhiyyə Nazirliyi Ədliyyə Nazirliyi, Maliyyə Nazirliyi, İqtisadiyyat Nazirliyi və icra prosesində müəyyən ediləcək digər aidiyyəti dövlət orqanları (dövlətin hüquqi şəxsləri) ilə razılaşdırmaqla:

Qanuna uyğun olaraq, əlaqələndirici qurumun səlahiyyətlərini həyata keçirən publik hüquqi şəxs statuslu “Orqan Donorluğu və Transplantasiyası üzrə Koordinasiya Mərkəzi”nin yaradılması ilə bağlı təkliflərini beş ay müddətində Nazirlər Kabinetinə təqdim etməlidir;

Koordinasiya Mərkəzinin nizamnaməsi və nizamnamə fondunun miqdarı ilə bağlı təkliflərini beş ay müddətində Nazirlər Kabinetinə təqdim etməlidir;

Koordinasiya Mərkəzinin strukturu və işçilərinin say həddi ilə bağlı təkliflərini beş ay müddətində Nazirlər Kabinetinə təqdim etməlidir.

Razılaşdırma prosesinin iştirakçıları (əsas və birgə icraçılar) bu sərəncamın icrası ilə bağlı normayaratma vəzifələrindən irəli gələn məsələlər üzrə (layihə və təkliflərin baxılması, hazırlanması, razılaşdırılması, təqdim edilməsi və s.) müvafiq tədbirlər görüb icra vəziyyəti tələb etdikdə, məlumatları icra üçün ayrılmış müddətin birinci yarısı başa çatanadək Nazirlər Kabinetinə təqdim etməlidirlər.

Eyni zamanda, hüquqi aktların layihələrini əsas icraçıya təqdim edən subyektlər “Normativ hüquqi aktlar haqqında” əməl olunmasını təmin etməlidirlər.

Mərkəzi icra hakimiyyəti orqanları üç aydan gec olmayaraq, fərmanın icrasını təmin etmək məqsədilə öz səlahiyyətləri daxilində normayaratma vəzifələrindən irəli gələn tədbirlər görüb, normativ hüquqi aktlarını və ya təkliflərinin olmadığı barədə məlumatı Ədliyyə Nazirliyinə təqdim etsinlər və icra vəziyyəti tələb etdikdə, Nazirlər Kabinetinə məlumat verməlidirlər.

Ədliyyə Nazirliyi mərkəzi icra hakimiyyəti orqanlarının normativ hüquqi aktlarının və normativ xarakterli aktların Fərmana uyğunlaşdırılmasını təmin edib, bu barədə dörd ay müddətində Nazirlər Kabinetinə məlumat verməlidir.

Sərəncamın icrası Nazirlər Kabineti Aparatının Hüquq və qanunvericilik şöbəsinə və Sosial məsələlər şöbəsinə həvalə edilib.

Bu Sərəncam imzalandığı gündən qüvvəyə minir.