Mayın 19-da Mədəniyyət Nazirliyində nazirliyin aparat işçilərinin, regional mədəniyyət idarələrinin rəhbərlərinin iştirakı ilə videokonfrans keçirilib.

APA-nın məlumatına görə, konfransda son günlər Mədəniyyət Nazirliyinin yüksək vəzifəli şəxslərinin saxlanılması, müvafiq orqanlar tərəfindən istintaq araşdırmalarının aparılması, bir sıra cinayət tərkibli faktların üzə çıxarılması müzakirə edilib.

Vurğulanıb ki, bu istiqamətdə müvafiq orqanlar tərəfindən araşdırmalar davam etdirilir və bütün təqsirkar şəxslər ciddi məsuliyyətə cəlb olunaraq qanun qarşısında cavab verəcəklər.

Videokonfransda həmçinin mədəniyyət müəssisələrinin fəaliyyətinin təmin olunması istiqamətində bir sıra vacib məqamlar diqqətə çatdırılıb, karantin rejiminin qismən yumşaldılması haqqında Nazirlər Kabineti yanında Operativ Qərargahın müvafiq qərarına uyğun olaraq, mayın 18-dən etibarən muzeylər, sərgi salonları və qalereyaların fəaliyyətinin bərpa edilməsi ilə bağlı lazımi işlərin görülməsinin zəruriliyi qeyd edilib. Bu məkanlarda dezinfeksiya tədbirlərinin davam etdirilməsi, ziyarətçilərin tibbi maskalardan istifadə etmələrinə diqqət yetirilməsinin vacibliyi vurğulanıb.

Hələlik fəaliyyəti bərpa olunmayan mədəniyyət müəssislərinin öz işlərinə sosial təcrid rejimi şərtlərinə uyğun davam etməsi, nazirlik tərəfindən elan olunmuş müsabiqələrin yekunları ilə bağlı müvafiq işlərin görülməsi tövsiyə olunub.

Videokonfransda təhsil müəssisələrinin fəaliyyətində şəffaflığın təmin olunması məsələsi xüsusilə qeyd edilib. İştirakçıların nəzərinə çatdırılıb ki, şagirdlərin musiqi və incəsənət məktəblərinə qəbulunun yalnız elektron qaydada həyata keçirilməsi təmin edilməlidir.

Beynəlxalq səviyyədə ölkəmizin mədəniyyətinin təbliği istiqamətində həyata keçirilən işlərin layiqincə davam etdirilməsinin vacibliyi vurğulanıb, Mədəniyyət Nazirliyinin fəaliyyətinin yeni qəbul edilmiş iş planına uyğun olaraq həyata keçirilməsi barədə tapşırıqlar verilib. Bildirilib ki, vəzifələr məsuliyyətlə yerinə yetirilməli və mədəniyyət sahəsində çalışan hər bir şəxs baş verənlərdən nəticə çıxarmalıdır.

Videokonfransın sonunda nazirliyin müvafiq struktur və idarə rəhbərlərinə nöqsanların aradan qaldırılması və neqativ hallara yol verilməməsi barədə ciddi tapşırıqlar verilib.