"Vüqar Səfərlinin rəhbərliyi dövründə Kütləvi informasiya vasitələrinin İnkişafına Dövlət Dəstəyi Fondunun (KİVDF) fəaliyyəti media üçün tam səmərəsiz olub. Biz bunu ilk vaxtdan dilə gətirmişik. Çox təəssüf ki, həmin dövrdə bizim sağlam tənqidlərimizi top-tüfənglə qarşılayırdılar".

Bu fikirləri Demokrat.az-a açıqlamasında Bakı Mətbuat Klubunun direktoru Arif Əliyev bildirib.

Arif Əliyev deyib ki, KİVDF-yə ayrılan milyonlarla dövlət vəsaiti bir neçə şəxs tərəfindən səmərəsiz istiqamətlərə yönləndirilib:

"Hesab edirəm ki, dövlətin vəsaitlərinə nəzarət edən qurumlar KİVDF-də yoxlamalar aparmalıdır. Çünki bu fonda milyonlarla vəsait ayrılsa da, indiyədək onun səmərəli nəticələri ortada yoxdur".

Arif Əliyev qeyd edib ki, Vüqar Səfərli bu sahədə üçüncü-dördüncü dərəcəli icraçı olub:

"Əslində, KİVDF-yə ayrılmış milyonlarla vəsait daha yuxarı yerdən - Əli Həsənov tərəfindən idarə olunub. Həmin vəsaitlərin hara xərclənməsinin hesabatını da bu adam verməlidir. Hesab edirəm ki, müvafiq dövlət orqanları KİVDF-də lazımı araşdırmalar aparmalı və həmin vəsaitlərin hara xərclənməsi bilinməlidir".

Arif Əliyev vurğulayıb ki, artıq KİVDF-yə yeni rəhbər gətirilib:

"İndi biz çalışmalıyıq ki, bundan sonra KİVDF-nin fəaliyyəti medianın xeyrinə olsun. Mənim üçün əsas məsələ bundan sonra KİVDF-nin necə idarə olunmasıdır. Yəni, bundan sonra KİVDF-nin fəaliyyəti necə olacaq, bu vacib əhəmiyyət daşıyır. Bundan sonra KİVDF-nin fəaliyyəti Azərbaycan mediasına inkişaf perspektivi açacaq, yoxsa yox! Biz daha çox bunun üzərində köklənməliyik".