Prezidentin məmurlara xalqın, özəlliklə aztəminatlı ailələrin problemlərinə diqqətlə yanaşmağı tapşırması, özbaşınalıq edənləri cəzalandıracağı haqqında xəbərdarlığı, “barmaq silkələməsi” kommunal xidmət qurumlarını və rabitə xidmətini , deyəsən , “silkələməyib”. Konstitusiyanın 73-cü maddəsinə zidd olaraq, heç kəsdən qanunda nəzərdə tutulmuş miqdardan artıq ödəniş tələb edilə bilməzliyinə baxmayaraq, vətəndaşlardan şişirtmə ödəniş tələb edərək xidmətdən məhrum edən sözügedən qurumlar əlillərin də BMT konvensiyası ilə təsbit olunan hüquqlarını pozmaqda davam edirlər. Bəri başdan deyək ki, heç bir istehlakçıdan dövlət sifarişi olan , ərazi planlaşdırılması həyata keçirilən sahənin sosial infrastrukturla təmin olunmaslna görə ödəniş tələb edilə bilməz. Belə çıxır, vətəndaş şəhərin mərkəzində özünə yol, nəqliyyat, kanalizasiya, işıq, qaz, rabitə və s. xətti çəkməlidir? Bəs onda hökumət nəyə lazımdır?
Əlillərin yaşadıqları evlərin və giriş qapılarının rabitə xidməti ilə təchizatı və təmin olunması müvafiq icra hakimiyyətinin üzərinə qoyulsa da, rabitə sahəsində müvafiq icra hakimiyyətinin səlahiyyətlərini Nəqliyyat, Rabitə və Yüksək Texnologiyalar Nazirliyi (NRYTN ) və onun müvafiq qurumları həyata keçirsə də, əlillərdən bu təchizata və təminata görə qanunsuz ödəniş tələb edərək xidmətdən imtina edən də elə NRYTN və yanındakı qurumlardır. Təsəvvür edin, 5 il olacaq ki, Yasamal Telefon Kommunikasiya Qovşağına (TKQ) ayda bir dəfə Baktelekomun baş direktoru Rövşən Əliyevin imzası ilə Badamdar qəsəbəsi, 2-ci massiv, 277-ci sahədə yaşayan əlil ailəsinə telefon çəkilməsi ilə bağlı müraciət edilir və hər dəfə də əlil sənədləşmə üçün Yasamal TKQ-ya gedəndə zavallı əlilə çağırılmadığı bildirilir. Özbaşınalığı təsəvvür edə bilirsinizmi? NRYTN Baktelekoma, Baktelekom Yasamal TKQ -ya qazinin, əlilin telefonla təmin olunmaq haqqında müraciətini rəsmi qaydada ortalıq 50 yol (!) göndərib və hələ də Yasamal TKQ-ya müraciətin daxil olmadığı bildirilir! Belə çıxır, Baktelekom “qaziyə qaç, tazıya tut” deyir? Onu da vurğulayaq ki, Yasamal TKQ-nın Pənah adlı əməkdaşı 4 il qabaq zəng edərək kabelləşmə aparıldığını və yaxın günlərdə əlil ailəsinə nömrə ayrılacağını deyib və indi məlum olur ki, telefon yuvası dolub və əlilə ayrılan nömrə də başqasına satılıb! (?) Elə bu “telefon satqınlığı” səbəbindən əlindən 2 dirək və 300 metr kabel almağı, üstəlik 400 manat da çəkiliş haqqı ödəməyi tələb edirlər. Bu özbaşınalığı şəbəkənin 100 metrdən qıraqda qalması ilə “əsaslandıran” “telefon satqınlarl”nı nə 5 illik rəsmi məktublar, nə kabelləşmənin düz evin qabağındakı dirəkdən “asılması” ilgilənındirmir. Heç demə, telefon çəkdirmək istəyən hər ev yiyəsi 2 dirək, 300 metr kabel almalıdır !? İstənilən halda, əlillərin telefon -rabitə, kommunikasiya texnologiyaları ilə təmin edilməsi , vurğuladığımız kimi, dövlətin hesabınadır. “Əlilliyi olan şəxslərin hüquqları haqqında” 31.05.2018 tarixli 1153-VQ saylı Azərbaycan Respublikası Qanununun 14 -cü maddəsində MÜVAFİQ İCRA HAKİMİYYƏTİ ORQANLARININ, MÜƏSSİSƏLƏRİN VƏ TƏŞKİLATLARIN TABELİKLƏRİNDƏ OLAN YOL-NƏQLİYYAT, RABİTƏ, İNFORMASİYA , MƏDƏNİYYƏT, MƏİŞƏT VƏ DİGƏR SOSİAL İNFRASTRUKTUR OBYEKTLƏRİNİN ƏLİLLƏRİN İSTİFADƏSİ ÜÇÜN AĞLABATAN UYĞUNLAŞDIRMALARI təsbit olunub.
Hələ də qanunu icra etmək məmurun ağlına batmır, əlilin, vətəndaşın başına ağlına batmayanlar gəlir!
MƏĞRUR BƏDƏLSOY
P.S.3 Dekabr -Beynəlxalq əlillər günüdür. ..
