Azərbaycanda tender yolu ilə dövlət vəsaitlərinin mənimsənilməsi halları artıq inkaredilməz bir hala gəlib çatıb. Bu gün ölkənin əksər Kütləvi İnformasiya Vasitələrində dövlət satınalmalarının şəffaf keçirilməməsi və bu yolla ayrılmış vəsaitlərin müəyyən hissəsinin təyinatından kənarlaşdırılması hallarından bəhs edən hər gün onlarla məlumatlar yayılır.Hesablama Palatasının son hesabatında da dövlət satınalmalarının şəffaf keçirilmədiyi və bu yolla vəsaitlərin mənimsənildiyini təsdiq edən rəqəmlər var.Son aylarda işlərində buraxdıqdıqları ciddi nöqsanlara görə həbs olunmuş rayon İcra Hakimiyyəti başçılarının da ayrılmış dövlət vəsaitlərinin bir hissəsinin tender yolu mənimsədiklərini hüquq mühafizə orqanları da aşkar etdi. Mədəniyyət nazirinin müavinin həbsində də podratçı təşkilat rəhbərləri tender yolu əldə etdikləri dövlət vəsaitlərinin müəyyən olunmuş hissəsini nəğd şəkildə sifarişçiyə qaytardıqlarını etiraf etdilər.Prezident İlham Əliyevin bu kimi halların qarşısının alınması məqsədi ilə atdığı addımlara, etdiyi çağırışlara baxmayaraq təəssüflər olsun ki, bir çox nankorlar dövlət vəsaitlərini talamaqdan əl çəkmək istəmirlər. Bütün bu kimi halların digər dövlət orqanlarında da baş verməsi bu gün istisna deyil.Götürək elə Təhsil Nazirliyini.Təhsil Nazirliyinə tabeli qurumlar tərəfindən keçirilən dövlət satınalmalarının qeyri şəffaf aparılması və bu yollarla vəsaitlərin israf olunması,kənarlaşdırılması hallarına biz ayrı bir məqalədə toxunacağıq.

Aktualinfo.org olaraq biz bu yazıda Təhsil Nazirliyi 11 saylı İnteqrasiya Təlimli İnternat Məktəb tərəfindən keçirilmiş və artıq bir neçə dəfə geniş ictimaiyyətin diqqətinə çatırdığımız tender məsələsinə bir daha qayıtmaq istərdik.Mətləbə keçməzdən əvvəl isə xatırlatmaq istərdik ki,sözügedən internat məktəbin direktoru Gülnarə Abdullayeva məqalədə yazdıqlarımıza və qoyduğumuz suallara cavab vermək əvəzinə güya bizim ona dəfələrlərlə zəng edərək pul tələb etməyimiz barədə Bakı şəhər Baş Polis İdarəsinə şikayət etmişdi.Bakı şəhər Baş Polis İdarəsinə olunan bu şikayət öz təsdiqini tapmadı. Təbii ki,onunla iki ay ərzində bircə dəfə danışdığımızı və bu zaman da heç bir pul tələbində olmadığımızı sübut etdik.Lakin məsələ bununla bitməmiş qalır. Biz Bakı şəhər prokuroru İlqar Abbasova müraciət edərək jurnalistə böhtan, şər atdığına və bu yolla peşə fəaliyyətinə maneə olmağa çalışdığına görə Gülnarə Abdullayevanın barəsində qanun çərçivəsində ölçü götürülməsini xahiş etdik. Baş prokuror yanında Korrupsiyaya Qarşı Mübarizə Baş İdarəsinə isə müraciət edərək 11 saylı İnteqrasiya Təlimli İnternat Məktəbin fəaliyyətinin araşdırılması məsələsəni qaldırdıq.Lakin Baş prokurorluğun sözügedən hər iki qurumundan da bu günə qədər hər hansı bir tədbirin görülməsi barədə heç bir cavab almadıq.Niyə? Bir mətbuat orqanı olaraq internat məktəbdə dövlət vəsaitinin tender yolu ilə mənimsənildiyini aşkar etdiyimizə görə? Axı Prezident İlham Əliyev öz çıxışlarında ictimai nəzarətin gücləndirilməsində mətbuatın böyük rol oynadığını dəfələrlə vurğulayıb.Bəs onda bu qədər müraciətlərdən sonra,dövlət vəsaitlərindən səmərəli istifadə etməyən,israfçılığa yol verən, satınalmalar haqqında qanunun tələblərini pozan, mətbuat işçisinə şər,böhtan atan,onun peşə fəaliyyətinə maneəçilik törədən bir direktorun fəaliyyəti bu gün niyə araşdırılmamış qalır?

Biz artıq yeni təyin olunmuş Baş prokuror Kamran Əliyevə müraciət edirik.

11 saylı İnteqrasiya Təlimli İnternat Məktəbı tərəfindən 30.03 2020-ci ildə 20000 kubmetr içməli suyun satınalmasına dair elan etdiyi tender üzrə 16.03.2020 -ci ildə “Dostluq Servis” MMC ilə 80000 manat məbləgində bağlamış müqavilədə şübhəli məqamların görsəndiyi barədə Aktualinfo.org saytında 03.04 2020-ci ildə məqalə yayılmışdır. Sözügedən internatın direktoru Gülnarə Abdullayeva məqalədə göstərilənlərə münasibət bildirmək, qoyulan suallara cavab vermək əvəzinə Aktualinfo.org saytının rəhbərliyi barədə Bakı şəhər Baş Polis İdarəsinə güya ondan hədə-qorxu yolu ilə pul tələb edildiyinə görə şikayət etmişdir.

Gülnarə Abdullayevanın polisə də,məhkəməyə də müraciət etmək hüququ vardır.Amma direktorun bu hüququndan mətbuat işçisinə şər və böhtan atmaq yolu ilə istifadə etməsi heç cür anlaşılan deyil.Xanım direktor dəfəlrlə ona zəng etdiyimizi,pul tələb etdiyimizi yazarkən yəqin hansı əsrdə yaşadığını unudub.İndi telekommunikasiya əsridir Gülnarə Abdullayeva. Müasir texnologoyilar vasitəsi ilə kimin kimə,neçə dəfə,hansı məqsədlərlə zəng etdiyini aydinlaşdırmaq o qədər də çətin məsələ deyil və səylərimiz sayəsəində tez bir zamanda öz həllini tapdı, bizim direktora iki ay ərzində dəfələrlə deyil, yalnız bir dəfə zəng etdiyimiz təsdiq olundu. Qeyd edək ki,bizlərə təzyiq göstərmək üçün Gülnarə Abdullayeva tərəfindən atılan bu addımın nə ilə sonuclanacağından asılı olmayaraq, Aktualinfo.org internat məktəbdə baş verən bəzi gizlin sövdələşmələri geniş ictimaiyyətin diqqətinə çatdırmaqda davam edəcək.

Bilgəh qəsəbəsində,gözdən könüldən üzaq bu internat məktəbdə nələrin baş verdiyini ötən yazılarda oxucuların diqqətinə çatdırmışdıq.Burada. bu qədər qanunsuzluqlara yol verdiyi halda xanım direktorun özünü təmizə çıxarmaq istəyi başa düşüləndi.Amma Gülnarə Abdullayevanın konkret adlarla,rəqəmlərlə,vaxtla göstərdiklərimizi böhtan adlandırması başa düşülən deyil. Biz mətbuat orqanı olaraq yazdıqlarımızın üstündə dayanırıq və burada heç bir böhtana yol verilmədiyini bir daha qeyd edirik.11.03.2020-ci ildə də 11 saylı İnteqrasiya Təlimli İnternat Məktəbi tərəfindən içməli suyun satınalması üzrə tenderin qalibinin ”Dostluq Servis” Məhdud Məsuliyyətli Cəmiyyətinin olması və ondan 20 gün sonra, yəni 30.03 2020-ci ildə”Dostluq Servis” Məhdud Məsuliyyətli Cəmiyyəti ilə içməli suyun satınalması üzrə 80000 manat dəyərində müqavilə bağlanılması barədə məlumatları biz dövlətin rəsmi orqanından əldə etmişik.Müqavilənin bağlanması barədə rəsmi bildiriş 16.03.2020-ci ildə elan olunub. Xanım direktor əgər bunları böhtan hesab edirsə, onda bu yalan məlumatları dövlət orqanı nə üçün yayıb?

Gülnarə Abdullayevanın özünü təmizə çıxarmaq istəyi redaksiyanı 11 nömrəli inteqrasiya təlimli İnternat Məktəb ətrafında daha geniş araşdırmalar aparmağa vadar etdi. Araşdırmalar zamanı əldə etdiklərimiz bizi bir qədər təəccübləndirdi. Yuxarıda qetd etdiyimiz kimi,11 nömrəli İnteqrasiya Təlimli İnternat Məktəbi tərəfindən 30.03 2020-ci ildə 20000 kubmetr içməli suyun satınalmasına dair tenderin nəticələrinə görə 80000 manat məbləğində müqaviləni “Dostluq Servis”MMC ilə bağlanmışdır.Qeyd edək ki, Dostluq Servis MMC 09.02.2016-cı ildə Vergilər Nazirliyinin Bakı şəhəri Lokal Gəlirlər Baş İdarəsində dövlət qeydiyyatına alınmışdır. Qanuni təmsilçisinin MİRİYEV FAMİL ŞAMİL OĞLU olan MMC nin hüquqi ünvanı BAKI ŞƏHƏRİ BİNƏQƏDİ RAYONU, AZADLIQ PR. , ev 187, m. 79-dur.

Araşdırma zamanı 11 nömrəli İnteqrasiya Təlimli İnternat Məktəb bu ünvanda,yəni BAKI ŞƏHƏRİ BİNƏQƏDİ RAYONU, AZADLIQ PR. ,ev 187, m.79 yaradılmış başqa bir MMC ilə də müqavilə bağlaması barədə əlavə məlumatlar əldə etdik. Belə ki,İnternat Məktəb tərəfindən çirkab suyun daşınması üzrə kotirovka sorğusunun 21.02.2020-ci il tarixdə”ANAR SERVİS MƏHDUD MƏSULİYYƏTLİ CƏMİYYƏTİ ilə 22000 manat dəyərində müqavilə bağlanmışdır. Qanuni təmsilçisi NAİLƏ MİRİYEVA MAİS QIZI olan bu MMC də Vergilər Nazirliyinin Bakı şəhəri Kiçik Sahibkarlıqla İş üzrə Baş İdarəsinə 02.02.2016-cı ildə dövlət qeydiyyatına alınmışdır.Qanuni təmsilçisi MİRİYEV FAMİL ŞAMİL OĞLU olan “Dostluq Servis”MMC-dən cəmi bir həftə əvvəl.Hüquqi ünvanı eyni olan bu MMC lərin bir ailəyə sahib olması demək deyilmi? Nizamnamə kapitalları 200 manat olan bu MMC-lər kimə məxsusdur? Gülnarə Abdullayevanı bu aılə ilə nə kimi işbirliyi bağlayır? Təhsil Nazirliyinin bu müəmmalı tenderlərdə nə kimi rolu var?Bunlar barədə növbəti yazılarda.

Bakı şəhər Baş Polis İdarəsinə etdiyi şikayətdə Gülnarə Abdullayeva İnternat Məktəbin bütün maddi texniki işlərinin Təhsil Nazirliyi tərəfindən həyata keçirildiyini qeyd edib.Direktorun bu iddiasına Təhsil Nazirliyinin rəsmiləri nə üçün susqunluq nümayiş etdirirlər? Təhsil Nazirliyi bununla içməli suyun satınalması üzrə keçirilmiş tenderdə yol verilmiş qanun pozuntularını bəlkə öz üzərindən atmaq istəyir? Bəlkə elə direktoru polisə müraciət etməyı öyrədənlər də nazirlk rəsmiləri olub? Təhsil Nazirliyi nəhayət, bütün bu kimi qaranlıq məsələlərə aydınlıq gətirməlidir.

Cəmi 40 gün içində bir ailəyə məxsus MMC-lərlə bağlanmış 100 min manat dəyərində müqavilələrin araşdırılması üçün Aktualinfo.org daha haralara müraciət etməlidir? Bizi izləyin.
Aktualinfo.org