Göygöl Mərkəzi rayon Xəstəxanası Publik Hüquqi Şəxsin harınlamış, təyinatından bəri qorxmadan korrupsiya və rüşvətə aludə olmuş direktoru Vasif Əliyev indi də xəstəxana kollektivinə qarşı qoçuluqla, əl-qol atmaqla, cərrahiyyə əməliyyatları üçün aldığı və ya pasientlərdən tələb etdiyi rüşvəti ifşa edən xəstəxana işçilərini başının dəstəsilə birgə döyməklə məşğuldur. Demokratik.Az-ın məlumatına görə, hazırda Göygöl rayon polis şöbəsində və rayon prokurorluğunda açılan cinayət işi məhz bu rəzillikdən bəhs edir, laboratoriya müdir Zeynalabdin Əliyevin şikayəti üzrə istintaq aparılır.
Yuxarıda ipucu verdiyim qəbuledilməz detallara varmadan hazırda TƏBİB adlı quruma rəhbərlik etməkdə olan Vüqar Qurbanova bir daha bildirək ki, sələfi Ramin Bayramlının Göygöl xəstəxanasına təyin etdiyi "60 minlik" direktorun adi etik davranış və idarəetmə bacarıqları yaşı 40-ı ötsə də formalaşmayıb. İxtisasca cərrah olan bu əndazə və səlahiyyət həddi tanımayan şəxsin oturduğu isti qucaqlardakı məstedici rahatlığı, şımarıqlığı, məhz Vüqar Qurbanovun və digər dövlət qurumlarının Vasif Əliyev davranışlarına biganəliyi onu direktorluq-həkimlik qılafından tamamən çıxarıb. Bu, bir kənddən ağır hikkələrilə şəhərə enən adam büründüyü cəzasızlıq mühitində ona həvalə edilmiş vəzifə səlahiyyətlərini ilk öncə qazanc məqsədilə istifadə edir, bacarıq-qabiliyyətinə görə deyil, maddiyyatla qonduğu kreslosuna xeyli ağır gəlir. Ən dəhşətlisi, Vasif Əliyev rayon Xəstəxanasını 1994-cü ildə hakimiyyəti ələ keçirmək üçün Ulu Öndər Heydər Əliyevə qarşı çıxmış Kəramət Kərimovu günlərlə Balçılıdakı bağında gizlətmiş, sabiq baş nazir Sürət Hüseynovla dostluq etmiş mərhum atası Şahin Əliyevin xırmandalı zənn edib istədiyi kimi tarıma çəkir. Adam o qədər xəstədir ki, nə il ərzində xəstəxanaya ayrılan 150 min manatlıq dərmanı yeməklə, nə xəstəxanada stasionar pasientlərə bişirilməli olan yeməkləri və gündəlik çörək və digər nazu-nemətləri həzm-rabe etməklə də doymaq bilmir. Tam əksi, direktor ola-ola təlimatdankənar bütün əməliyyatlara burnunu soxan, rüşvət alaraq xəstələri doğrayan Əliyev gün keçdikcə tamahını qılıncdan da iti edir. Bu kimi faktları yazsaq da, desək də Vüqar əfəndinin öz tabeliyindəkinə qulaqburması verməməsinə şahidlik etməkdəyik. Bu isə, ölkə səhiyyəsinin inkişafına, kadrların seçimində şəffaflığa həssas yanaşan prezidentin TƏBİB rəhbərliyinə etimadına ən azından hörmətsizlikdir.

Beləliklə, xəstəxanadakı dava olayına keçək;
Mayın 25-də, saat 14:30 radələrində direktor Vasif Əliyev yanına cərrah İlkini, Simral, Elşad, Fuad, Nazim, Nazir adlı nəzarəçiləri götürərək xəstəxananın radiologiya şöbəsinin ikinci mərtəbəsində fəaliyyət göstərən laboratoriyaya hücuma keçib. Direktor və yandaşları dava etmək niyyətilə laboratoriya müdiri Zeynalabdin Əliyevin iş otağına daxil olduqdan sonra, mikroskopla işləyən adamı döyməyə başlayıblar. Əvvəlcə, direktor ağır sözlərlə Z.Əliyevi təhqir edib, onu stolun arxasındaca şillə ilə vurub. Ardınca da, cərrah İlkin laboratoriya stoluna təpikləyib otaqda əlinə keçən nə varsa hər şeyi zərərçəkmişin başına vurmaqla, əl-qol atmaqla döyüblər.

Dava zamanı otağın qapısı direktorun göstərişilə koridordan bağlanıb və Simral adlı nəzarətçi davanı durdurmağa çalışan işçilərin otağa girməsini dayandırıb. Lakin, şöbənin xanım işçiləri Təqiqət Ağayeva və Ceyran Məmmədova israrlı cəhddən sonra otağa daxil olaraq direktoru və qoçuluq edən İlkini birtəhər koridora çıxara biliblər. Dava zamanı laboratoriya otağındakı tibbi ləvazimatlar, qoruyucu kamera, ventilyator, mikroskop, petri, karon və şüşəli əşyalar sındırılaraq yararsız vəziyyətə salınıb. Otağın döşəməsi şüşə qırıqları ilə dolub, rəngli maye sabunu yerlə bir olub. Xadimə işləyən Ceyran Məmmədovanın dava əsnasında Vasif Əliyevə; "Səni pul alıb direktor qoyana lənət, sən özünü apara bilmirsən. Get ərizəni yaz, rədd ol bu xəstəxanadan, canımız qurtarsın səndən.." sözləri xəstəxananın koridorlarında artıq trend olub.

Olayla bağlı Demokratik Az-a danışan Zeynalabdin Əliyevin bildirdiyinə görə, davaya səbəb onun xəstəxanada pasientlərdən yığılan və tələb edilən rüşvət faktlarına etiraz etməsi ilə əlaqədar olub. Laboratoriya müdiri deyir ki, əməliyyat öncəsi xəstələr laboratoriyada analizlər verdikdə onlardan rüşvət istənildiyini öyrənib. Eləcə də pullu xəstələrin müxtəlif müayinələr üçün Vasif Əliyev tərəfindən "Gəncə İstanbul NS" klinikasına göndərilməsinə, pasientlərin əlavə xərcə salınmasına, xəstəxanada müasir laborator şərait ola-ola kənara göndərişlərin özbaşınalıq olduğuna etiraz edib. Çoxsaylı xəstələri rüşvət verməməyə, aldanmamağa çağırıb. Nəticədə, özü də cərrahlıq edən direktor tamah məqsədilə və öz rüşvət mexanizmini qorumaq hikkəsilə sözügedən biabırçılığa imza atıb.
Z.Əliyevin başına gələnlərdən aydın olur ki, Vasif Əliyev özünün də əməliyyatında iştirak etdiyi xəstələri Gəncədəki klinikalara pasient göndərişinin hər biri üçün müəyyən gəlir əldə edir. Eləcə də, adi apendisit üçün vətəndaşlardan 250 manat, öd kisəsinin çıxarılması üçün 300-400 manat, doğum şöbəsində analardan, digər şöbələrdə müalicə adı ilə müxtəlif məbləğlərdə rüşvət yığılır.

Zeynalabdinin bildirdiyinə görə, dava günü cərrahların əməliyyat üçün tanıdığı daha bir pasientdən də 250 manat rüşvət aldıqlarını öyrənib. Pasientə görə öz cibinin pulu ilə reaksinlər alıb öz işini gördükdən sonra, İlkin həkimdən xəstənin pulunun geri qaytarılmasını xahiş edib. İlkin etiraz etdikdə, xəstəyə əməliyyat xərclərinin İcbari Tibbi Sığorta tərəfindən ödənildiyini söyləyərək şikayət üçün direktor Vasif Əliyevin yanına göndərib. Məhz bundan sonra Vasif Əliyev Z.Əliyevə zəng edərək: "sən kimsən ki, xəstələri öyrədirsən, bizim pul işimizə qarışırsan axı.."-deyib və qısa zaman sonra da utanmadan öz qoçuluğunu edib.

Direktorun təşkil etdiyi davanın xəstəxanadakı təhlükəsizlik kameralarına da yansıdığı bildirilir. Baş verənlər isə adi xuliqanlıq, adamdöymə əməli deyil, Azərbaycan Respublikası Cinayət Məcəlləsinə görə xəstəxana direktorunun Vəzifə səlahiyyətlərini aşma, vəzifədən sui-istifadəsidir. İşin içində rüşvətalma, tabeliyindəkiləri rüşvətə sövqetmə cinayəti var.
Həmin məcəllənin 308.2-ci maddəsinə görə, "vəzifəli şəxsin xidməti vəzifələrinin icrası ilə əlaqədar özü və ya üçüncü şəxslər üçün qanunsuz üstünlük əldə etmək məqsədilə öz qulluq səlahiyyətlərindən qulluq mənafeyinə qəsdən zidd olaraq istifadə etməsi və ya qulluq mənafeyi tələb etdiyi halda istifadə etməməsi fiziki və ya hüquqi şəxslərin hüquqlarına və qanuni mənafelərinə, yaxud cəmiyyətin və ya dövlətin qanunla qorunan mənafelərinə mühüm zərər vurduqda – iki min manatdan dörd min manatadək miqdarda cərimə və ya üç ilədək müddətə müəyyən vəzifə tutma və ya müəyyən fəaliyyətlə məşğul olma hüququndan məhrum etmə və ya iki ilədək müddətə islah işləri və ya üç ilədək müddətə azadlığın məhdudlaşdırılması və ya üç ilədək müddətə azadlıqdan məhrum etmə ilə cəzalandırılır. Bu Məcəllənin 308.1-ci maddəsi ilə nəzərdə tutulmuş əməllər ağır nəticələrə səbəb olduqda — üç ilədək müddətə müəyyən vəzifə tutma və ya müəyyən fəaliyyətlə məşğul olma hüququndan məhrum edilməklə üç ildən yeddi ilədək müddətə azadlıqdan məhrum etmə ilə cəzalandırılır.

Olayda ortaya çıxan ictimai önəmli məsələ Göygöl MRX PHŞ-də hələ də rüşvət və korrupsiyanın mövcudluğunun təsdiqi, direktorun harınlığı və qudurğanlığıdır. Əgər bu səhiyyə ocağında hələ də abırsızcasına, ləyaqətsizcəsinə icbari tibbi sığorta ödəmələrilə əməliyyat olunan, müalicə alan xəstələrdən rüşvət alınırsa, bu hal ciddən araşdırılmalıdır. Əgər, əhali icbari tibbi sığortanın Xidmətlər Zərfi çərçivəsində Göygöl MRX PHŞ-də məhz direktor Vasif Əliyevin cərrah bıçağının altında rüşvətlə soyulursa və buna İcbari Tibbi Sığorta üzrə Dövlət Agentliyi, TƏBİB və digər başbilənlər özləri münbit şərait yaradırlarsa bu özbaşına ünvanda prezident administrasiyası, baş prokurorluq və DTX tərəfindən xüsusi yoxlamanın keçirilməsi məcburidir. Ədalətli araşdırma üçün isə, ümumiyyətlə harınlamış Vasif Əliyev dərhal vəzifəsindən uzaqlaşdırılmalı, onun illərdir toplamış olduğu rüşvətə şəriklilik həvəsi kimsələrdə olmamalıdır. Əgər, Vasif Əliyevin gəlişindən bəri xəstəxanada əməliyyat olunan, övlad dünyaya gətirən şəxslərin bir çoxu obyektiv dindirilsələr rüşvət mexanizmi ifşa edilmiş olar. Son illərdəki mühasibat-uçot sənədləri də diqqətlə vərəqlənsə, dərmanların hara yoxa çıxdığı soruşulsa, korrupsiya deyilsə hansı zərurətlə eyni çarpayı sayı olan xəstəxanada Vasif Əliyevin 100-dən artıq süni ştat yaratmasının səbəbləri öyrənilərsə dövlət səhiyyəsini bunca gözdən salan bir direktorun həbsi sadə iş olar.

Bu olaydan sonra da Vasif Əliyev öz direktor toxunulmazlığını qoruya biləcəksə, rəzil hadisə harınlamış direktorla dostluq edən rayon prokurorumuz İlqar Hacızadə tərəfindən malalanacaqsa, bəri başdan deyirəm - Vasifkimilərə züy tutanlara, ona tumar çəkənlərə sadəcə AR OLSUN!

Osman Nərimanoğlu
Demokratik.Az