Prezident İlham Əliyev yanvarın 12-də yerli telekanallara müsahibəsində məmurlara xəbərdarlıq etdi. Bildirdi ki, son illər ərzində göstərdiyimiz qətiyyət və sözlə əməl arasında olan vəhdət hər kəs üçün dərs olmalıdır. Problemin kökü təkcə məmurun öz vəzifəsini vicdanlı və qanunauyğun şəkildə icra edib-etməməsi ilə məhdudlaşmır. Bu həm də idarəetmə sistemində əsaslı dəyişikliklər etməyi tələb edir. Son illər ərzində aparılmış institusional islahatlar bu problemlərin bir çoxunu həll edib. Xüsusilə ASAN Xidmətinin tətbiqi və getdikcə təkmilləşdirilməsi məmur-vətəndaş münasibətlərinə xeyli şəffaflıq gətirib və bunun nəticəsini hər bir vətəndaş gündəlik həyatında hiss edir. Yerli idarəçilik orqanlarının işinin təkmilləşdirilməsi də bu baxımdan çox faydalı ola bilər. Prezident bu məsələyə də toxunaraq bu istiqamətdə aparılan islahatların dərinləşəcəyini bildirdi.
Bir müddət əvvəl bəzi icra hakimiyyətlərinin fəaliyyətləri ilə bağlı aşkarlanan və cəmiyyətə təqdim olunan neqativ hallar bu sahədə köklü islahatların aparılmasının vacibliyi ilə bağlı müzakirələrin açılmasına səbəb olmuşdu. İcra hakimiyyətlərinin ləğv edilməsi, böyük şəhərlərdə mer seçkilərinin keçirilməsi, bələdiyyə institutunun təkmilləşdirilməsi təkliflər sırasında idi.
Ötən ilin son ayında isə Prezident İlham Əliyevin Qarabağ iqtisadi rayonuna daxil olan işğaldan azad edilmiş ərazilərdə Azərbaycan Respublikası Prezidentinin xüsusi nümayəndəsinin təyin edilməsi haqqında sərəncamı məsələnin əhəmiyyətini yenidən gündəmə gətirdi.
Konkret olaraq bir neçə icra başçısının fəaliyyətindəki neqativ hallara görə Prezident İlham Əliyev bir sıra mühüm qərarları qəbul etdi. Həmçinin həbs edilənlər də oldu və Azərbaycan cəmiyyəti də burada hansı formada işlərin qurulduğunun şahidi oldu. Bu gün ümumiyyətlə dünyada müxtəlif idarəçilik modelləri üzərində iş gedir. İcra hakimiyyəti strukturu sovet dövründən mövcud olan bir struktur idi. Katiblik, raykomlar və s. Bu gün isə görünən odur ki, bizdə də bu qədər icra hakimiyyətinin fəaliyyətinə ehtiyac yoxdur. Cənab Prezidentin sərəncamı ilə Qarabağ üzrə xüsusi nümayəndəsinin təyin edilməsi ona hesablanmış bir addımdır ki, artıq bölgü aparılır və bu qərar idarəçilik sahəsində atılmış məqsədəuyğun addımdır.
Zaman-zaman təyin olunan icra başçıları davranışlarında özlərini hər şeyin sahibi kimi mükəlləf aparırdılar. Bu da vətəndaş narazılığına səbəb olurdu, biznesin inkişafına əngəl yaradırdı, həmçinin yerli sahibkarlara basqılar belə edilirdi. İnstitutsional olaraq yerli icra hakimiyyətlərinin özünü doğrultmadığı aşkar görünür. İndi görünən odur ki, addım-addım yerli icra hakimiyyəti strukturlarının ləğvi, əvəzinə böyük iqtisadi rayonların inzibati ərazi vahidlərinin yaradılması və Prezidentin səlahiyyətli nümayəndələrinin təyin olunması prosesinə start verilib.
Görünən odur ki, ölkədə mərkəzi və yerli icra orqanlarının fəaliyyətinin optimallaşdırılması vacib şərtlərdən birinə çevrilib. Ancaq bu o demək deyildir ki, optimallaşdırma prosesi reallaşana qədər icra hakimləri istədikləri qanunsuzluqları edə və cəzasız qala bilərlər.
Hazırda yerli icra hakimiyyətləri başçılarının xalqa, dövlətə, cəmiyyətə münasibətdə səmimiyyətlərinin ən çox sınağa çəkildikləri məsələ Vətən müharibəsi şəhidlərinin ailə üzvlərinə, qazilərə və onların problemlərinə nə dərəcədə həssas yanaşmalarıdır. Təəssüf, bəzi rayon rəhbərləri bu sınaqdan çıxa bilmirlər. Bu günlərdə redaksiyamıza Füzuli rayonunun 2-ci Qayıdış qəsəbəsindən şəhid Abbasov İlham Əli oğlunun anası Abbasova Qönçə Şiraslan qızı müraciət edərək bildirmişdir ki, erkən yaşlarından atasız qalan, çadır şəhərciyində min bir əziyyətə qatlaşaraq böyütdüyü 6 övladdan (iki oğul, bir qız) yalnız rəhmətlik İlham işləyirmiş. O, şəhid düşəndən sonra yeganə gəlirləri şəhid ailəsi kimi aldıqları müavinətdir ki, bu da dolanışıqlarına yetmir. İkinci oğlunu işə düzəltmək məqsədilə müraciət etdiyi RİH başçısı Alı Alıyev onları xeyli cəhdlərindən sonra qəbul edib. Qönçə xanım yalvar-yaxar edib ki, özü şəkər xəstəliyindən, qan təzyiqindən əziyyət çəkir, ürəyindən əməliyyata məruz qalıb, oğluna iş istəyir. Onlar rayon rəhbərinə məlum idarələrdən birində boş iş yerinin olduğunu da deyiblər. Başçı isə onların “gözlərinin içinə qədər” yalan danışdıqlarını iddia edib və hirslənərək özündən çıxıb. Şəhidin anasına da sərt şəkildə bildirib ki, sosial məsafəni qorusun, yaxın gəlməsin, pandemiya şəraitidir. Bu azmış kimi, şəhidin qardaşına kətil tullayıb, təpik vurmağa çalışıb. Qönçə xanım deyir ki, insident zaman görüşdə iştirak edən I Qarabağ müharibəsi əlili Möhtərəm adlı şəxs də baş verənlərin şahidi olub.
Ümumiyyətlə, Alı Alıyevin barəsində ictimai rəy heç vaxt yaxşı olmayıb. Rayon rəhbəri vəzifəsinə irəli çəkilməzdən əvvəl işlədiyi Füzuli rayon Aqrar Sənaye Kombinatının direktoru, Füzuli rayon Suvarma Sistemləri İdarəsinin rəisi olarkən vəzifələrindən sui-istifadə edib, kreslosunu, səlahiyyətlərini özünə var-dövlət toplamaq fürsəti kimi dəyərləndirib. Etibarlı mənbələr bildirirlər ki, qanunsuz sahibkarlıqla məşğul olan Alı Alıyev II Qarabağ müharibəsi başlayanda sahibi olduğu fermalardakı 1000 başdan yuxarı sayda mal-qarasını tələsik satıb ki, birdən ordunun ehtiyacı üçün istəyərlər, yox deyə bilməz.
Alıyevin təkcə Füzuli rayonundakı örüş sahələrinə, mebel sexlərinə, restoranlara deyil, paytaxt Bakıda, Binəqədi rayonunda da biznesə, mənzil və obyektlərə malik olduğu bildirilir. Yiyələndiyi haram gəlirlə böyütdüyü oğlu Elvin Alıyev də qanunazidd hərəkətlərinə görə daxili işlər orqanlarından kənarlaşdırılıb.
Mövzuya qayıdacağıq.
dia.az
