Redaksiyamıza daxil olan növbəti şikayət vətəndaşın torpağının qanunsuz şəkildə əlindən alınması ilə bağlıdır.

Sonxeber.az-ın məlumatına görə, şikayətçi iddia edir ki, Daşınmaz Əmlakın Texniki İnventarlaşdırılması şöbəsinin müdiri Ramiz Babayev vətəndaş İgid Əhədovun yoldaşının adına olan çıxarışlı torpağı özbaşına onun qonşusuna satıb.

Şikayətçi bildirir ki, 52 kv.m. sahəsi olan torpağı qonşusu Şahpələng Mehdiyev tərəfindən zəbt olunub:

"2006-cı ildə mən torpağı qonşumdan almışdım. 2018-ci ildə giriş hissədəki həmin 52 kv.m.-lik yeri yenidən öz adına saldırıb. Həyətin girişi birdir, hasarın içərisindədir. Biz metrə ilə ölçdükdə torpaq öz yerindədir, amma lazer aparatı ilə ölçdükdə göstərir ki, 52 kvadat metr bizim deyil. Nə oldu? Buxarlanıb havaya uçmayıb ki? Əlimdə çıxarış, müqavilə hər şey var. 2018-ci ildən bu yana lazımi hər yerə müraciət etmişəm. Hazırda iş inzibati məhkəmədədir. O da İcra Hakimiyyətinə göndərəcək, ordan da Sabunçu Kənd Bələdiyyəsinə, ya da kənd sovetinə.".

Məsələ ilə bağlı "193" qaynar xətti ilə əlaqə saxladıq. Operator xanım bildirdi ki, bu iddianı rəsmi müraciətlə bildirmək lazımdır. Əmlak Bakıda yerləşirsə, Daşınmaz Əmlakın Dövlət kadastrı və registr publik hüquqi şəxsin 1 saylı Bakı ərazi idarəsinə müraciət etməlidir ki, məsələ araşdırılsın və nəticə ilə bağlı məlumat verilsin. Əgər vətəndaşın tərtib olunan çıxarışla bağlı hər hansı bir iddiası varsa, bu, yalnız məhkəmə vasitəsilə öz həllini tapa bilər".