3 avqust 2021-ci ildə Azərbaycanın Baş prokuroru Kamran Əliyev polis əməkdaşı Zaur Mirzəyevi döydüyü deyilən deputat Eldəniz Səlimov barəsində Azərbaycan Cinayət Məcəlləsinin 309.2-ci (vəzifə səlahiyyətlərindən sui-istifadə) maddəsi ilə cinayət işinin başlanılması məsələsinə aydınlıq gətirib. O, hadisə zamanı polis əməkdaşı vəzifə başında olmayıb və bu səbəbdən 315-ci maddənin (hakimiyyət nümayəndəsinə müqavimət göstərilməsi və ya zor tətbiq edilməsi) yersiz olduğunu bildirib. Baş prokuror hesab edir ki, əks halda bu maddənin tətbiqi məsələsinə baxılardı.
Qeyd etmək istərdik ki, Baş prokurorun açıqlaması Daxili İşlər Nazirliyi (DİN) tərəfindən 30 iyul 2021-ci ildə yayılan məlumatlarla tamamilə ziddiyyət təşkil edir. Bu məlumata görə, hadisə 2021-ci il iyulun 29-da Xaçmaz rayonunun Nabran qəsəbəsi ərazisində, Milli Məclisin deputatı Eldəniz Səlimovun qohumuna məxsus iaşə obyektində baş verib. DİN bildirmişdi ki, E.Səlimov konfliktli vəziyyət yaradıb, polis işçilərinin karantin rejiminin tələbləri ilə əlaqədar obyektin bağlanması tələblərinə etiraz edib.
Qeyd etmək istərdik ki, karantin rejiminə riayət olunmasına nəzarət DİN-ə həvalə edilib. Bu, o deməkdir ki, karantin tələblərinə görə obyektin bağlanmasını tələb edən işçilər vəzifə başında olublar.
AYNA məsələyə aydınlıq gətirməyə çalışıb.
Bu sualla əlaqədar müraciət etdiyimiz DİN mətbuat xidmətinin rəhbəri Ehsan Zahidov məzuniyyətdə olmasını əsas gətirərək, bizi Bakı Şəhər Baş Polis İdarəsinin (BŞBPİ) mətbuat xidmətinin rəhbəri Elşad Hacıyevə yönləndirdi. Hacıyev isə bildirdi ki, Z.Mirzəyevin döyülməsi polis əməkdaşlarının Milli Məclisin deputatı Eldəniz Səlimovun yaxın adamlarının sahibi olduğu ictimai iaşə obyektinin bağlanması tələbini irəli sürməsindən xeyli sonra baş verib.
“Zaur Mirzəyev evdə olarkən millət vəkili ilə görüşə çağırılıb. Bu, o deməkdir ki, deputatla baş verən hadisə zamanı o, xidmətdə olmayıb”, - deyə BŞBPİ sözçüsü vurğuladı.
Vəkil Elmar Süleymanov isə məsələnin belə qoyuluşu ilə razılaşmır: “Cinayət Məcəlləsinin 315-ci maddəsində vəzifə səlahiyyətlərinin icrası ilə əlaqədar bir dövlət məmuruna qarşı zor tətbiq edilməsindən bəhs edilir. Karantin rejiminin tələbləri ilə əlaqədar olaraq iaşə obyektinin bağlanması tələbini irəli sürən Zaur Mirzəyev rəsmi vəzifələrini yerinə yetirib. Bu, o deməkdir ki, ona qarşı zorakılığın tətbiqi rəsmi vəzifələrinin icrası ilə əlaqədardır. Ona görə də onun döyülməsi ilə bağlı Azərbaycan Cinayət Məcəlləsinin 315-ci maddəsi ilə cinayət işi başlanmalıdır”.
Biz də Cinayət Məcəlləsini diqqətlə araşdırdıq və vəkilin sözlərinin doğruluğuna əmin olduq.
Bununla yanaşı, deputat tərəfindən döyülən Zaur Mirzəyevin də fikrini öyrənməyə çalışdıq. Ancaq təəssüf ki, o, suallarımızı cavablandırmaqdan imtina etdi.
