Pandemiya ilə əlaqədar olaraq elan edilmiş karantin dövründə bir çox ticarət mərkəzləri və digər satış şirkətləri online fəaliyyət göstərirdi. Yəni bütün seçim və satış xidmətləri internet üzərindən həyata keçirilirdi. Buna görə də bir çox satış obyektlərinin dələduzluq faktları meydana çıxdı. Alıcıların seçdiyi malın yerinə yanlış, yaxud keyfiyyətsiz, qüsurlu malların göndərilməsi və sair kimi faktlar üzə çıxdı. Bu kimi hallar dələduzluq və istehlakçı hüquqlarının pozulması faktlarıdır.
İndi sizə təqdim edəcəyimiz vətəndaş da DogruXeber.az informasiya agentliyinə məhz bu kimi halla üzləşməsi, “Saloğlu” mebel şirkəti tərəfindən aldadılması, istehlakçı hüququnun pozulması barədə şikayət ərizəsi ilə müraciət edib.
Bakı şəhər Yasamal rayon sakini Cavadova Pərvanə Rəsul qızı öz ərizəsində bildirir ki, “Saloğlu” mebel mağazasından online məhsul alıb. Sosial şəbəkə vasitəsilə şirkətin satıcısıylə əlaqə saxlayıb, şəkillər əsasında seçim edib, divan sifariş verib. Lakin, şirkət onun seçimini deyil, tamamilə fərqli və qüsurlu bir divan göndərib. Xanım divanı şirkətə geri iadə etməyə və ya dəyişməyə cəhd etsə də şirkət xanımın haqlı tələbini təmin etməmişdir.
“Saloğlu” şirkəti bu davranışı ilə vətəndaşın qanunvericilikdə nəzərdə tutulmuş “İstehlakçı hüququnun müdafiəsi haqqında qanun” ları kobudcasına pozmuş olur.
Qanunda bildirilir ki, “əgər alınan mal istehlakçının tələblərinə cavab vermirsə, 14 gün müddətində qaytarıla və ya dəyişdirilə bilə. Belə ki, istehlakçının bəyəndiyi başqa mal varsa, dəyişdirilə bilər, yoxdursa, istehlakçı malı qaytara bilər".
Vətəndaşın DogruXeber.az informasiya agentliyinin redaksiyasına göndərdiyi ərizəsini olduğu kimi təqdim edirik.
DogruXeber.az İnformasiya
agentliyinin redaksiyasına
Yasamal rayon. Ə.Əhmədov küçəsi
Ev41. mənzil 53 ünvanında yaşayan
Cavadova Pərvanə Rəsul qızı
tərəfindən
ƏRİZƏ:
Yazib sizə bildirirəm ki, pandemiya ilə əlaqədar olaraq bir çox firmalar öz mallarının satışını online şəkildə həyata keçirir. Mən də Cavadova Pərvanə 11.01.2021- ci il tarixində “Saloğlu” mebel mağazasında keçirilən kompaniyadan yararlanmaq niyyəti ilə online olaraq ehtiyacım olan divan sifariş etdim. Sifariş etdiyim divanı instagram sosial şəbəkədə seçib, maraqlanmışam. “Saloglu” instagram səhifəsini idarə edən mağaza əməkdaşlarından biri ilə yazışıb, seçdiyim məişət əşyası haqqında suallarımı vermişəm. Suallarımdan biri də bu idi ki, əgər sifariş etdiyim divanın yerinə başqa biri yanlış göndərilərsə necə olacaq? (Son zamanlar online sifarişlərdə çox tez-tez yanlışlıqlar olduğunun şahidi oluruq)
Mağaza əməkdaşı mənə cavab verdi ki, “olan halda sizin həmin əşyanı geri qaytarmaq ixtiyarınız var”.
Divan seçimim şəkil və videogörüntü vasitəsilə, alqı-satqımız da whatsapp sosial şəbəkəsi üzərindən aparıldı.
Mağaza əməkdaşı ilə olan yazışmalarımızı hələ də saxlamışam. Mənim seçimim qəhvəyi rəng olduğu üçün yenidən əlavə olaraq mənə qəhvəyi rəngli divan şəkli göndərildi. Bu şəkildə Divanın kürəklərinin aralı olduğunu gördüm. Satıcı mənə səsli mesaj vasitəsilə izah etdi ki, mağazada düzgün tənzimlənməyib, ona görə şəkildə elə görünür. Evimdə elə deyil, birinci şəkildə gördüyüm kimi olacaq.
Divanın rəngi və ölçüsünü də soruşdum. Lakin, mənə yalnız uzunluq ölçüləri barədə məlumat verdilər. (3.30-1.75) eni barədə isə heç bir cavab vermədilər.
Mən də bu işin mütəxəssisi olmadığım üçün ölçülərin yetərli olduğunu düşündüm və 18 ay faizsiz ödənişlə olduğunu da nəzərə alıb sifarişimi verdim.
Sifarişi verdikdən bir gün sonra 12.01.2021 tarixində mənim evimə gəlib özlərini “MJ Finans bank”ın nümayəndələri olaraq təqdim edən şəxslər mənə müqavilə imzaladan zaman kreditin bank vasitəsilə olduğunu öyrəndim.
14.01.2021-ci il tarixində “Saloğlu” mebel mağazasının əməkdaşı mənə zəng edib, sifarişimin ünvanıma göndərildiyini bildirdi. Mən səhiyyə əməkdaşıyam. Həmin vaxt işdə olduğum üçün həyat yoldaşıma zəng etdim ki, sifarişi qarşılasın.
Divan binanın həyətinə Daxil olarkən, bağlama şəklində olmayıb. Sadəcə üzəri klyonka vasitəsilə bükülüb, yapışqan lentlə bağlanmış olub. Hətta divanın ayaqları da açıq - ayrıca gətirilib. Divanın həyətə hansı vəziyyətdə gətirildiyi yaşadığım binanın komendatura kamerasında qeydə alınıb. Həmin videogörüntülər də məndə var. Həyat yoldaşım sifarişin niyə açıq gətirildiyini soruşub, cavabında əməkdaşlar bildiriblər ki, “liftə yerləşmədiyi üçün bağlaması açıldı”
Halbuki, divanın ayaqları kiçik ölçülüdür. Bağlama şəklində gətirilə bilməsi mümkündür.
Divanı quraşdırdıqdan dərhal sonra ustalar tələsdiklərini bildirib, çatdırılma sənədini imzalayıb onları tez yola salmalarını tələb ediblər.
Mən işdən evə döndüyümdə divanın sifariş verdiyim divan olmadığını görən kimi dərhal satıcıya zəng edib, divanın yanlış göndərildiyini və ölçülərinin də evimə uyğun olmadığını bildirdim. Satıcı mənə dedi ki, “narahat olmayın, mən məlumat verəcəm, gəlib baxıb, həll edəcəklər.”
15.01.2021-ci il tarixində şirkətin nümayəndəsi evə gəldi, divana baxdı, şəklini çəkdi. Divanı geri qaytarmaq, ya da heç olmasa dəyişmək istəyimizi də qeyd etdi. Zəmanətdə 14 gün ərzində malı geri qaytarmaq ixtiyarımızın olduğunu, etiketlərin hələ də malın üzərində olduğunu, qoparılmadığını bildirdim. Hətta, həmin şəxsə daşınma haqqını özüm ödəyəcəyimi dedim. Bizimlə tezliklə əlaqə saxlanılacağını deyib getdi. 16.01.2021-ci il tarixində özünün “Saloğlu” şirkətində səlahiyyətli şəxs olduğunu deyən İlkin müəllim adlı bir nəfər mənə zəng etdi. Şikayətimizlə maraqlandı və məni dinlədikdən sonra şikayətimizin əsassız olduğunu bildirdi.
Həyat yoldaşım ölçülərin də satıcının bildirdiyi kimi olmadığını dedi. Cavabında İlkin müəllim aqressiv şəkildə “istəsəm o divanın ölçüsünü 3.50 sm belə çıxara bilərəm” –dedi. Biz yenə də şirkətin səhvinə anlayış göstərib, “online sifarişdir, ola bilər yanlışlıq olub, başa düşürük. Amma, xahiş edirik bu yanlışı düzəldəsiniz “-dedik. Bizə dedilər ki, malın üzərindəki əmtəə nişanı artıq zədələnib. Hansı ki, gətirilən zaman malın üzərində heç bir əmtəə nişanı olmayıb.
“Saloğlu” şirkətinin laqeydliyi qarşısında çarəsiz qalıb, bankın nümayəndələri ilə əlaqə saxladıq, şirkətlə problem yaşadığımızı bildirdik. Bank əməkdaşları “Saloğlu” divanı geri götürərsə, krediti ləğv etməyə hazır olduqlarını bildirdilər.
Mən 18.01.2021- ci il tarixində Antiinhisar Dövlət Xidmətinə də müraciət etmişəm. Lakin, heç kim mənim üzləşdiyim mövcud problemlə maraqlanmayıb. Ona görə də artıq çarəmi məsələni ictimailəşdirməkdə görürəm. Odur ki, sizdən xahiş edirəm üzləşdiyim problemdən qurtulmağım üçün mənə dəstək göstərəsiniz.
Onu da qeyd edim ki, divana ödəniş etmişəm, ödənişin qəbzini də 19.01.2021-ci il tarixində kassadan götürmüşəm. Şəkilləri də var.
Alqı-satqı online olduğu üçün məndə mağazanın dəqiq ünvanı yoxdur. Əlimdə olan ünvan və telefon nömrələri bunlardır.
Saloğlu mebel fabriki-1441 Heydər Əliyev. Ağstafa
Tel: (+994 2222)-5-24-71
Nəsimi rayonu. Albert Aqarunov 8 A
Baş ofis: (012)404-49-03
Satıcı Esmira: (055) 525-85-48
İlkin müəllim: (055) 525-12-22
İmza: Cavadova Pərvanə
22.01.2021
PS: Biz də öz növbəmizdə vətəndaşın şikayətini araşdırmaq məqsədilə “Saloğlu” mebel şirkətinin satış müdiri İlkin müəllim ilə telefon əlaqəsi saxladıq. İlkin müəllim isə bu barədə şirkətin hüquqşünası ilə əlaqə saxlamağımızı dedi. Biz şirkətin hüquqşünası ilə də əlaqə saxladıq. Lakin, çox təəsüflər olsun ki, hələ də suallarımız cavabsız, vətəndaşın şikayəti isə təmin edilməmiş olaraq qalmaqdadır.
