Prezident İlham Əliyevin sərəncamı ilə general-leytenant Fuad Məmmədovun tutduğu vəzifədən azad edilməsi fəaliyətində yol verdiyi nöqsanlarla bağlı ola bilər.
Yenisabah.az xəbər verir ki, hələ bir müddət əvvəl Müdafiə nazirinin maddi-texniki təminat üzrə müavini – Maddi-Texniki Təminat Baş İdarəsinin rəisi olan Fuad Məmmədov barədə mediada neqativ çalarlı məlumatlar dərc edilirdi. Həmin xəbərlər bildirilirdi ki, Müdafiə Nazirliyinin Daxili Təhlükəsizlik İdarəsi Maddi Texniki Təminat Baş İdarəsində son illərdə baş verən qəribə olaylarin üstünü açıb. Məlum olub ki, müəyyən şəxslər Müdafiə naziri general-polkovnik Zakir Həsənovun etimadından sui-istifadə edirmiş. İddialara görə, Fuad Məmmədovun rəisi olduğu qurumu əslində Azad Salamov adlı mülki şəxs idarə edib.
Azad Salamov adli bu şəxs 2-3 il ərzində korporativ maraqlarına görə, Maddi Texniki Təminat Baş İdarəsinin strukturlarının vəzifə-ştatını bir neçə dəfə dəyişməyə nail olub və Fuad Məmmədovun təqdimatı və əmri ilə ixtisası uyğun gəlməyən zabitləri müxtəlif vəzifələrə təyin edib.
Bildirilirdi ki, Azad Salamov ixtisası raket artilleriya silahları muhəndisi olan xalası oğlu polkovnik-leytenant Əliyev Elgunu avtomobil hərbi hissəsinə komandir təyin etdirərək həmin hərbi hissədən şəxsi maraqları üçün istifadə edib.
Xalası oğlu isə rəsmi vəzifəsi referent olan Azad Salamov üçün “Niva” markalı xidməti avtomibil ayırıb. Bundan başqa, MAXE-lərdən birini xidmətdən yayındırıb. Onun tapşırığı ilə həmin MAXE şəxsi avtomobili ilə Azad Salamovun ailə üzvlərinə sürücülük edir.
Başqa bir fakt isə əvvəllər Maddi Texniki Təminat İdarəsində MAXE olan və heç bir hərbi təhsili olmayan Tural Məmədova leytenant rütbəsinin verilməsilə bağlıdır. İddia olunur ki, bu şəxs hərbçi olsa da, ayağı hətta ön cəbhəyə yaxın yerlərlə dəyməyib. Amma buna baxmayaraq Azad Salamovun dəstəyilə mayor rütbəsinə qədər yüksəlib.
Bundan başqa Fuad Məmmədovun 2016-cı ilin yanvar ayında verdiyi, lakin 2015-ci il ilin dekabr ayına qeydiyyata salınmış əmrləri ilə Azad Salamov ikinci ixtisas dərəcəsi olmasına baxmayaraq “usta” dərəcəsi alıb. Bununla da hər ay dövlət bu şəxsə əlavə 500 manat verməyə məcbur olub.
Fuad Məmmədovun işdən çıxaırlmasından az əvvəl mətbuata ayaq açan bu məlumatların heç biri təkzib olunmayıb. Beləliklə, ehtimal etmək olar ki, Fuad Məmmədov bu cür əməllərinə görə vəzifəsinə əlvida demək məcburiyyətində qalıb. //yenisabah.az//
