"İşsiz şəxslərə birdəfəlik ödəmənin verilməsinə başlanıb".
“Qafqazinfo” xəbər verirki, bunu Əmək və Əhalinin Sosial Müdafiəsi Nazirliyinin İctimaiyyətlə əlaqələr və kommunikasiya şöbəsinin müdiri Fazil Talıbov deyib.
Qurum rəsmisinin sözlərinə görə, ilk olaraq 10 min işsiz şəxs üçün birdəfəlik ödəmə bank filiallarına və poçt şöbələrinə köçürülüb. F.Talıbov bildirib ki, onların müraciət edərkən qeyd etdikləri telefon nömrəsinə bu barədə SMS göndəriləcək.
"Yalnız bu mesajı aldıqdan sonra işsiz şəxslər evdən çıxmaq üçün müvafiq qaydada icazə alaraq, SMS-də “Azərpoçt” MMC qeyd edilibsə istənilən poçt şöbəsinə, SMS-də bank göstərildiyi halda isə həmin bankın istənilən filialına şəxsiyyət vəsiqəsi ilə müraciət edib vəsaitlərini ala bilərlər. Ödəmələrin verilməsi gündəlik davam edəcək və qeydiyyata alınan digər işsiz şəxslər də bu ödənişlə təmin ediləcəklər", - deyə nazirlik rəsmisi bildirib.
***
Məsələ ilə bağlı Nəqliyyat, Rabitə və Yüksək Texnologiyalar Nazirliyi də məlumat yayıb.
Nazirliyin mətbuat xidmətinin rəhbəri Günel Gözəlova bildirib ki, NRYTN yanında "Azərpoçt" MMC-də də işsiz şəxslərə birdəfəlik ödəmənin verilməsinə başlanılır.
"Yalnız SMS-də “Azərpoçt” MMC qeyd edilibsə, şəxsiyyət vəsiqənizi təqdim etməklə "Azərpoçt"un respublika üzrə sizə yaxın poçt şöbəsinə müraciət edin", - deyə qurum rəsmisi qeyd edib.
