“Ekologiya və təbii sərvətlər nazirinin müavini Novruz Quliyevin rəhbərliyi altında Badamdardakı sürüşmə ərazisində xüsusi qərargah yaradılıb”


“Report”un xəbərinə görə, bunu Ekologiya və Təbii Sərvətlər Nazirliyinin Milli Geoloji Kəşfiyyat Xidmətinin Geoloji planlama ekspedisiyasının rəisi Əziz Qaralov sürüşmə zonasında keçirdiyi brifinqdə deyib.

O bildirib ki, qərargah bu gündən fəaliyyətə başlayıb: “Sürüşmə oktyabrın 1-də müşahidə olunub və bu barədə Ekologiya və Təbii Sərvətlər Nazirliyi tərəfindən müvafiq orqanlar məlumatlandırılıb. Mütəmadi olaraq biz hər gün müşahidələr aparırıq və bu gün prosesdə aktivlik gərgin vəziyyətə gəldi. Sürüşmə eni 300 metr olan bir ərazidə üstündə istinad divarları ilə birlikdə yamac boyu asfalt istiqamətində irəlilədi.

Yamac boyu, təxminən, 11 yaşayış evi və asfaltın alt hissəsində iki iaşə obyekti var. Dünən axşam sakinlər müvafiq orqanlar tərəfindən xəbərdar edildilər və bütün kanalizasiya sistemi dayandırıldı. Su, qaz, işiq üçün orqanlara xəbərdarlıq edildi ki, təhlükə yaranmasın. Hazırda müşahidələr davam etdirilir.

Sürüşmənin xəritəsi dünən hazırlanıb. Nə qədər ərazini əhatə edir və nə qədər yaşayış obyektinə xələl dəyəcəyi haqqında müfəssəl məlumat hazırlayıb Nazirlər Kabinetinə təqdim etdik, onlar tərəfindən də müvafiq orqanlara paylanıldı. Prosesdə hələ gərginlik var. Burada ilk sürüşmə 2012-ci ildə baş verib. Həmin vaxt istinad divarları tikildi. Növbəti gərginlik bu ayın əvvəlindən başladı”.