Çin hakimiyyəti koronavirusla bağlı durumu vaxtında ictimaiyyətə çatdırmağı vacib saymayıb.
“Report” “Daily Mail”ə istinadən xəbər verir ki, ölkə rəhbərliyi infeksiya barədə məlumatlı olduğu halda, onu altı gün sonra ictimaiyyətə çatdırıblar. Nəticədə bu müddət ərzində minlərlə insan koronavirusa yoluxub.
Qəzetin yazdığına görə, rəsmi Pekin cari il yanvarın 14-də səhiyyə sahəsində böyük bir problemlə üz-üzə olduğuna dair qərar qəbul edib. Ancaq Çin Xalq Respublikasının sədri Si Cinpin xalqı yanvarın 20-də xəbərdar edib.
Məlumatda vurğulanıb ki, altı gün ərzində infeksiya mənbəyi Hubey vilayətinin Uhan şəhərində on minlərlə insan yeni ilin gəlişini qeyd edib. Beləliklə, yeni il tədbirlərindən evlərinə dönən milyonlarla insan xəstəliyi yayıb. Çin hakimiyyətinin birhəftəlik sükutu ərzində üç mindən çox insanın koronavirusa yoluxduğu fərz edilir.
Xatırladaq ki, aprelin 14-də ABŞ-ın müdafiə naziri Mark Esper “FoxNews”a müsahibəsində Çini pandemiyanın ilkin mərhələsində şəffaf olmamaqda ittiham edib. Onun sözlərinə görə, bu, koronavirusa qarşı mübarizəyə yardım edə bilərdi: “Onlar bu gün də informasiyanı gizlədirlər. Çini infeksiya ilə bağlı bilgilərini bölüşməyə məcbur etmək lazımdır. Bu virusu araşdırmaq üçün hamı ilə əməkdaşlıq edirik. Bütün dünya əməkdaşlıq etməlidir. Çindən belə bir davranışı sadəcə olaraq görmürük”.
