Azərbaycanda biabırçı DEZİNFEKSİYA fırıldağı... - Bu durumda da qazancı üstün tuturlar...



Koronavirusun yayılması Azərbaycanda maska və spirtlə yanaşı, dezinfeksiya xidmətini də bahalaşdırıb. Sputnik Azərbaycan-ın apardığı araşdırma zamanı məlum olub ki, təmizlik şirkətlərinin bir kvadrat metr sahənin dezinfeksiyası üçün təklif etdikləri qiymət 50 qəpikdən 1 manata qədər bahalaşıb. Hətta bəzi yerlərdə dezinfeksiya üçün bir kvadrat metrə 3 manat tələb edən təmizlik şirkətləri də var.

Bakı Dezinfeksiya Mərkəzinin rəhbəri Akif Məmmədov Sputnik Azərbaycan-a açıqlamasında bildirib ki, qiymət siyasəti həmin şirkətlərin öz işi olsa da, hər təmizlik şirkəti dezinfeksiya işi apara bilməz. A. Məmmədovun sözlərinə görə, dezinfeksiya üçün mütləq təmizlik şirkətinin lisenziyası olmalıdır: "Ölkə ərazisində özəl sektora məxsus kifayət qədər dezinfeksiya şirkətləri var. Onlar lisenziya aldıqdan sonra bu fəaliyyətlə məşğul olurlar. Belə şirkətlər ayrıca xidmət göstərirlər. Onlar bizim tabeliyimizdə deyillər, bizə heç bir aidiyyatı yoxdur. Əgər lisenziyaları varsa, bu fəaliyyətlə məşğul ola bilərlər. Lisenziyalaşma Səhiyyə Nazirliyi tərəfindən həyata keçirilir".

A. Məmmədov deyir ki, dezinfeksiya üçün təmizlik şirkətləri ilə müqavilə bağlamazdan öncə həmin şirkətin fəaliyyətini də araşdırmaq lazımdır: "Bəzi təmizlik şirkətləri var ki, qapı-qapı düşüb dezinfeksiya üçün pul yığırlar. Vətəndaşlar belə şirkətlərə aldanmasınlar. Onların çoxunun dezinfeksiya üçün lisenziyası belə, yoxdur. Onların fəaliyyəti elə qapılara düşməklə müştəri toplamaqlarından bəllidir".
A. Məmmədovun sözlərinə görə, vətəndaşlar dezinfeksiya şirkətləri ilə müqavilə bağlayarkən hansı məhlullardan istifadə edəcəklərini də diqqət yetirməlidirlər: "Bəzən belə şirkətlər istifadə etdikləri dərman məhlullarının baha olduğunu əsas gətirib qiyməti qaldırırlar. Vətəndaş da bu sahə üzrə mütəxəssis olmadığından aldanır. Ona görə də, müqavilə bağlayan MİS-lər, komendantlar bu məsələyə diqqət yetirməlidirlər".

Elə əlaqə saxladığımız təmizlik şirkətlərinin çoxu da elə qiymət artımına istifadə etdikləri dərman məhlullarının keyfiyyətinin yüksək olmasını əsas gətirdilər.

"Expel Azərbaycan" təmizlik şirkətindən bildirdilər ki, dezinfeksiya üçün qiymətlər fərqlidir: "Bizdə qiymət 1 kv metrə 50 qəpikdən 3 manatadəkdir. 3 manata dumanlama işləri də aparırıq. Bu xidmət zamanı virusun qalma ehtimalı demək olar ki yoxdur. Amma bunun üçün bahalı dezinfeksiyaedici məhlullardan istifadə edirik. İşlətdiyimiz dezinfeksiya edici məhlullar Almaniya istehsalı olduğundan, bahalıdır. 1 kvadrat metri 50 qəpiyə təklif edilən dezinfeksiya isə Belarus istehsalı olan ucuz məhlullarla aparılır".

Şirkətdən bildirdilər ki, yaşayış binalarında blokları 100-120 manata dezinfeksiya edirlər.

"Pak təmizlik" şirkətindən isə bildirdilər ki, əvvəl dezinfeksiya xidmətinin qiyməti hər kvadrat metrə 50 qəpik olsa da hazırda 1 manatdır: "İndi dezinfeksiyaya tələbat artıb. Bizdə qiymətlər əsasən dezinfeksiya ediləcək məkanın sahəsinə görə dəyişir. 200 kv sahənin dezinfeksiyasına 200 manat tələb edilir. Dezinfeksiyanın kvadratı 1 manatdır. Əgər sahə 200 kvadratdan artıq olarsa 70 qəpiyə dezinfeksiya edirik".
Şirkətdən bildirdilər ki, dezinfeksiya üçün lisenziyaları var: "Lisenziya olmadan fəaliyyət göstərməyimiz mümkün deyil".

"Kristal təmizlik" şirkətindən də dezinfeksiyanın eyni qiymətə aparıldığını söylədilər.

"ALFA-SS" Profilaktik Dezinfeksiya və Təmizlik şirkətindən Sputnik Azərbaycana bildirdilər ki, əvvəl qiymət bir kvadrat metrə 50 qəpik olsa da, hazırda 70 qəpikdir. 500 manata isə yaşayış binasının bloklar, mərtəbələr, giriş-çıxışlar dezinfeksiya edilir.

"PAOS" şirkətindən bidirdilər ki, lisenziya əsasında fəaliyyət göstərirlər: "Bizim şirkət Avropa və Amerikanın tanınmış Pestcontrol şirkətləri ilə əməkdaşlıq edir və onların istehsal etdiyi pestisidlərdən yararlanır. Qiymətlər bir kvadrat metrə 1 manatdan təklif edilir. Dezinfeksiya ediləcək sahə böyük olduqca qiymətdə endirim edirik" .

Qeyd edək ki, koronovirusun yayılmasından istifadə edən işbazlar isə bundan bəhrələnməyə, artıq gəlir əldə etməyə çalışırlar. Artıq qoruyucu maskaların, spirtlərin qiyməti artıb. Amma təkcə apteklər deyil, bəzi dezinfeksiya şirkətləri də göründüyü kimi vəziyyətdən istifadə edirlər. Onlar yaşayış binalarında hər bir mənzilindən 2 manat almaqla dezinfeksiya xidməti göstərirlər.

Mütəxəssislər isə dezinfeksiyanın təsirli olması üçün istifadə edilən preparatların keyfiyyətli olmasını və bu işin professional şəkildə aparılmasının vacib olduğunu söyləyirlər. Respublika Gigiyena və Epidemiologiya Mərkəzindən bildirdilər ki, dezinfeksiyanın qalıcılıq müddəti ən azı 4 ay olmalıdır.
Oxşar xəbərlər
«    Апрель 2020    »
ПнВтСрЧтПтСбВс
 12345
6789101112
13141516171819
20212223242526
27282930 
Mədəniyyət