Azərbaycanla İran gömrükçüləri arasında “e-TIR Pilot” layihəsi müzakirə olunub

Azərbaycanla İran gömrükçüləri arasında “e-TIR Pilot” layihəsi müzakirə olunub

Azərbaycan və İran gömrükçüləri arasında “e-TIR Pilot” layihəsi müzakirə edilib.

Dövlət Gömrük Komitəsinin mətbuat və ictimaiyyətlə əlaqələr idarəsindən AZƏRTAC-a bildirilib ki, fevralın 27-də Azərbaycanın Astara şəhərində Azərbaycan və İran gömrük orqanlarının nümayəndə heyətləri arasında görüş keçirilib. Görüşdə “BYD Kitabçası tətbiq edilməklə beynəlxalq yük daşımaları haqqında” Gömrük Konvensiyası (BYD Konvensiyası, 1975-ci il) ilə tənzimlənən prosedurlar çərçivəsində iki ölkə arasında tranzit əməliyyatlarının tam elektronlaşdırılmasını nəzərdə tutan “e-TIR Pilot” layihəsi müzakirə olunub.

Müzakirələrdə Azərbaycan tərəfindən Dövlət Gömrük Komitəsi Texnoloji İnnovasiyalar və Statistika Baş İdarəsinin rəisi Təmkin Xəlilov, Beynəlxalq Əməkdaşlıq İdarəsinin rəisi Dilavər Fərzəliyev, tranzit əməliyyatları şöbəsinin rəisi Fərid Vəliyev, Cənub Ərazi Baş Gömrük İdarəsi rəisinin müavini Faiq Seyidov və Azərbaycan Beynəlxalq Avtomobil Daşıyıcıları Assosiasiyasının (ABADA) nümayəndələri, İran tərəfindən isə Gömrük Administrasiyasının İnformasiya Texnologiyaları üzrə Baş direktoru xanım Hayede Bageripur, beynəlxalq əməkdaşlıq üzrə Baş direktor Hoseyn Kaxki, Tranzit Baş Direktoratlığının müavini Mostafa Ayəti, ikitərəfli əməkdaşlıq bölməsinin rəhbəri Əmir Həbibvənd və İran Ticarət Palatasının (ICCIMA), eləcə də Tehran Universitetinin Tətbiqi Sistemlər üzrə Tədqiqat İnstitutunun nümayəndələri iştirak edib.

Görüş zamanı iki ölkə ərazisindən keçən beynəlxalq nəqliyyat dəhlizlərində beynəlxalq avtomobil daşımalarına gömrük nəzarətinin elektron platformalar üzərindən kompüterləşdirilməsi imkanlarının genişləndirilməsi, eləcə də müasir elektron metodların tətbiqi ilə beynəlxalq daşımaların gömrük tənzimlənməsi məsələlərinə baxılıb, bu sahədə fəaliyyətin əlaqələndirilməsi məqsədilə ikitərəfli icra planının hazırlanması nəzərdən keçirilib.

Tərəflər görüşdə “e-TIR Pilot” layihəsi üzrə müvafiq qanunverici çərçivənin, pilot layihədə iştirak edəcək gömrük orqanları və daşıyıcıların, eləcə də ilk pilot daşımaların başlanması üçün vaxt çərçivələrinin müəyyən edilməsi, texniki imkanların yaradılması, elektron sistemdən istifadə üzrə gömrük əməkdaşlarının hazırlığının təmin edilməsi üçün təlimlərin keçirilməsi məsələlərini də müzakirə ediblər.

Qeyd edək ki, Azərbaycan və İran gömrük orqanları tərəfindən sözügedən sahədə əməkdaşlıq Şimal-Cənub beynəlxalq nəqliyyat dəhlizinin əsas komponenti olan iki ölkə ərazisinin tranzit potensialının genişləndirilməsi və beynəlxalq daşımaların rəqabətqa-biliyyətliliyinin artırılması işinə töhfə verəcək. Azərbaycan 2018-ci ilin oktyabrında, İran isə 2019-cu ilin yanvarında BYD prosedurlarının elektronlaşdırılmasını nəzərdə tutan əsas prinsipləri imzalayıb.

Nümayəndə heyətləri arasında görüş fevralın 28-də İranın Astara şəhərində davam etdiriləcək.
Oxşar xəbərlər
«    Ноябрь 2019    »
ПнВтСрЧтПтСбВс
 123
45678910
11121314151617
18192021222324
252627282930 
Mədəniyyət